Elimizdiń ońtústik óńirlerindegi egis alqaptarynda qansha sý únemdeledi
NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev elimizdiń ońtústik óńirlerindegi egis alqaptarynda qansha sý únemdeýge bolatynyn aıtty, dep habarlaıdy QazAqparat tilshisi.
«Bıylǵy vegetatsııalyq kezeń turaqty ótti. Degenmen de óte shıelenisti boldy. Almaty oblysynda qar jamylǵysy ótken jyldarmen salystyrǵanda 35% az boldy. Іle ózeniniń aǵyndylyǵy eki-úsh esege azaıdy. Al sýarmaly jerlerdiń aýdany 2019 jylmen salystyrǵanda 11% ulǵaıdy. Joǵaryda atalǵan faktorlarǵa qaramastan, jalpy vegetatsııa sátti ótti dep aıtýǵa bolady», - dep málim etti mınıstr Úkimet otyrysynda.
Onyń aıtýynsha, oblysta kúrish egý alańy on myń gektardy nemese jalpy sýarmaly alańnyń eki paıyzyn quraıdy. Bul rette kúrish alqaptaryna oblys boıynsha paıdalanylatyn sýdyń on paıyzy nemese jylyna 350 mln tekshe metr sý jumsalady.
«Osyǵan baılanysty kúrish egisin qysqartý qajet dep sanaımyz. Al, únemdelgen sýdyń esebinen ylǵaldy az qajet etetin daqyldardyń 40 myń gektar egistikterin sýarýǵa múmkindik paıda bolady», - dedi Myrzaǵalıev.
Budan bólek, Jambyl oblysynda 2020 jyly sý kólemi ortasha kóp jyldyq derekterden 15-20%-ǵa tómen boldy. Transshekaralyq ózenderde sý bólý boıynsha týyndaǵan qıyndyqtarǵa qaramastan, oblysta vegetatsııalyq kezeń turaqty ótti. Boljanǵandaı sý az tsıkldy eskere otyryp, birtindep ylǵaldy az qajet etetin daqyldarǵa kóshý jáne sý únemdeý tehnologııalaryn belsendi engizý kerek.
«Túrkistan oblysynda Syrdarııa ózeniniń aǵyny 2020 jyly on bes paıyzǵa jáne onyń negizgi resýrsy bolyp sanalatyn Toqtoǵul sý qoımasynyń (Qyrǵyzstan) kólemi
2019 jylǵa qaraǵanda 2 mlrd tekshe metrge az boldy. Osyǵan qaramastan, sýarmaly sýdy jetkiliksiz berý faktileri tirkelgen joq. Maqtaral aýdanynda 4 myń gektar jerde kúrish ósirilgenin aıta ketkim keledi. Eger de osyny qysqartqan jaǵdaıda, 158 mln tekshe metr sý únemdeledi. Tıisinshe, osy únemdelgen sýdyń esebinen on úsh myń gektar ylǵaldy az qajet etetin daqyldardy sýarýǵa bolady», - dep túsindirdi mınıstr.
Onyń sózine qaraǵanda, Qyzylorda oblysy boıynsha sýarmaly jerlerdiń aýdany 251 myń gektardy qurady. Bul - eldiń jalpy sýarmaly alańynyń on alty paıyzy. Osylaı bola tura, oblys jalpy respýblıka boıynsha paıdalanylǵan aǵyn sýdyń 43% nemese tórt tekshe shaqyrym sýdy qoldandy. Jalpy oblys boıynsha aǵyn sýǵa qatysty óte kúrdeli jaǵdaı baıqaldy.
«Sonymen qatar, kúrish egistiginiń aýdany 90 myń gektardy quraǵanyn atap ótkim keledi. Al agroónerkásip keshenin damytý baǵdarlamasyna sáıkes, egis alańy 75 myń gektardan aspaýy tıis», - dedi M. Myrzaǵalıev.
