Elimizdiń ońtústik óńirindegi tasjoldarda kóktaıǵaqpen kúres kúsheıtilgen rejımde júrýde

ASTANA. QazAqparat - Respýblıkalyq mańyzy bar avtojoldarda kóktaıǵaqpen kúres jumystary kúsheıtilgen rejımde jalǵasýda, dep habarlaıdy QazAqparat»QazAvtoJol» ulttyq kompanııasyna silteme jasap.

Ótken eki táýlik ishinde elimizdiń ońtústik óńirleri aýmaǵynda jańbyr men qar túrinde jaýyn-shashyn bolyp, temperatýranyń kúrt aýytqýy baıqaldy. Osylaısha, ótken túnde jol boıynda tótenshe jaǵdaılardyń aldyn alý úshin Almaty jáne Jetisý oblystaryndaǵy respýblıkalyq trassalardyń 6 ýchaskesinde qozǵalysqa shekteý engizildi. Respýblıkalyq mańyzy bar avtojoldardy óńdeý úshin 1070 tekshe metr qum-tuz qospasy paıdalanyldy.

«Jol bóligin qum-tuz qospasymen óńdeý jumystary kúsheıtilgen rejımde jalǵasýda. Árbir ýchaskege jol-paıdalaný tehnıkasy bólindi, joldardyń júrý bóligi dırektıvti normalarǵa sáıkes tazartylyp, óńdelýde.

Budan basqa, Túrkistan oblysynyń jolshylary Shymkent qalasynan Qyzylorda oblysynyń shekarasyna deıingi «Samara-Shymkent» avtojolynyń ýchaskesin sý basyp, shaıylyp ketýine jol bermeı, jedel sharalar qabyldady. Inertti materıaldary bar 1200-den astam qap tóseldi, sý burý jumystary júrgizildi», - dep jazdy jaýapty vedomstvodan.

Respýblıkalyq avtojoldar jelisinde qysqy kútip-ustaý jumystaryn atqarýǵa 477 birlik arnaıy tehnıka men 1 myńnan astam jol jumysshysy jumyldyryldy.