Elimizdiń ońtústiginen 12 otbasy Pavlodar oblysyna qonys aýdardy
ASTANA. QazAqparat - Ońtústik Qazaqstan oblysynan «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasynyń úshinshi baǵyty boıynsha 12 otbasy Pavlodar oblysyna kóship kelgen, dep habarlaıdy pavlodarnews.kz .
Bul týraly Dostyq úıinde ótken oblystyq qoǵamdyq keńes otyrysy kezinde oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Baltabaı Qappasov málim etti.
«Bizdiń oblysqa jumys isteý maqsatynda qonys aýdarýǵa nıet bildirgen oralmandarǵa 100 otbasy (500 adam) jáne ózge oblystardan kelýshilerge 50 otbasy (250 adam) kóleminde kvota berilgen, - deıdi Baltabaı Qappasov. - Osy kúnge deıin Pavlodar oblysyna Ońtústik Qazaqstannan 12 otbasy jáne 15 oralman otbasy qonys aýdardy».
Basqarma basshysynyń aıtýynsha, óńirimizde túrli mamandyq salasynda 35 00 bos jumys oryn bar. Onyń 1 055-i - aýyldyq jerlerde. Degenmen aımaqta 20 myń adam jumyssyzdar retinde tizimge alynǵan. Bul úsh jyldan beri turaqty saqtalyp kele jatqan kórsetkish. Jalpy, 31 kásip túri boıynsha mamandar tapshy.
Eske sala keteıik, jýyrda Shymkent qalasynda ótken bıznes forým nátıjesinde Ońtústik Qazaqstan oblysynan 110 adam Pavlodar oblysynyń 10 aýdanyna qonys aýdarýǵa nıet bildirgen.
