Elimizdiń ońtústiginde qar jaýyp, turǵyn úılerge jylýdy qaıta qosýǵa týra keldi-ákim

TÚRKІSTAN. QazAqparat – Elimizdiń ońtústiginde kún kúrt sýytyp, qar jaýdy. Túrkistan qalasynda aýa raıynyń salqyndap ketýine baılanysty qaıta jylýdy qosýǵa týra kelgen, dep habarlaıdy QazAqparat tilshisi.

Qala ákimi Rashıd Aıýpov kúnniń kúrt sýytýyna baılanysty kópqabatty úılerdiń turǵyndary úshin ortalyq jylý qazandyǵyn qaıta qostyrǵanyn habarlady.

«Aldymyzdaǵy birneshe kún boıy aýa temperatýrasynyń tómendeýine baılanysty jaýapty mamandarǵa kópqabatty úılerdiń jylýyn qaıta qosýdy tapsyrdym. Buǵan qosa, áleýmettik jaǵdaıy tómen otbasylarǵa kómir jetkiziletin bolady. Qazirgi ýaqytta «Otyrar» yqshamaýdanyna jylý berilse, 1 jáne 2 móltekaýdandardaǵy ahaýlar retke keltirilip, bir-eki saǵat ishinde iske qosylmaq»,- dep jazdy qala ákimi Facebook -tegi jelisindegi paraqshasyna.

Osy ýaqytta kún Shymkent qalasynda da sýyq. Qalada gúldep turǵan jemis aǵashtary men kóktemgi gúlder aq ulpaǵa orandy.

Aıta keteıik, buǵan deıin «Qazgıdromet» 8 jáne 9 sáýirde Túrkistan oblysynyń keı jerleri men Shymkent qalasynda qatty jaýyn-shashyn bolyp, sońy qarǵa ulasatynyn habarlaǵan edi. Óńirde 9-10 sáýir kúnderi aýa temperatýrasy túnde 0-2 gradýsqa deıin tómendeýi múmkin delingen bolatyn.