Elimizdiń ońtústigi Maqtaaral aýdanynda maqta terimi bastaldy

Máselen, J.Nurlybaev aýyldyq okrýgindegi «Nurjan» sharýa qojalyǵy 5,8 gektar jerge «Maqtaaral 47/27» maqta sortyn ekken. Búginde qojalyq 27 tsentnerden ónim alyp, «Qaraqyr» maqta qabyldaý pýnktine ótkizbek. Jalpy bıyl maqtaaraldyq sharýalar 38 myń gektardan asa jerge maqta shıtin sepken bolatyn. Byltyr aýa-raıynyń qolaısyzdyǵy men maqta zııankesteriniń kóp bolýyna qaramastan, aq altynnan 96 myń tonna ónim jınalǵan edi. Ortasha ónimdilik 25 tsentnerge áreń jetken bolatyn. Al, bıyl bul mejeden asamyz degen josparyn aýdannyń aýyl sharýashylyǵy bóliminiń basshysy Óser Myrzamdanov jasyrmady. «Qazirgi tańda maqta alqaptarynda japyraqtardy qýratý jumystary bastalyp ketti. Aýdan boıynsha 7842 gektar ǵana maqtalyq alqap defolıatsııalanǵan. Bul - óte tómen kórsetkish. Sondyqtan, sharýalarǵa túsindirý jumystaryn barynsha júrgizýdemiz. Kúni keshe ǵana aýdan ákimi Baqyt Asanovtyń bastamasymen dál osy másele boıynsha semınar-keńes ótkizdik», - dedi Ó.Myrzamdanov.Aıta keteıik, ótken jyly aýdanda maqta óndiretin 5 zaýyt jáne maqta qabyldaıtyn 69 beket sharýalarǵa qyzmet kórsetken. Bıyl da bul óndiris oryndary jıyn-terim naýqanyna daıyn. Kúzgi dala jumystaryn júrgizýge shilde, tamyz, qyrkúıek, qazan aılaryna memleket tarapynan jeńildetilgen baǵamen 4420 tonna janar jaǵarmaı bólinip, «Sapali Munai» JShS-i arqyly 1560 tonna, «RosAzııaNeft» JShS-i arqyly 1430 tonna, «Standart Oil Petrleum» JShS arqyly 1430 tonna janar jaǵarmaı sharýalarǵa taratylýda. Maqta terim naýqanyna daıyndaý úshin kombaındarǵa jóndeý jumystary júrgizilgen. Qosymsha aýdanymyzǵa AQSh-tan 16 dana «Djon-Dır» maqta terim kombaıny satyp alynǵan. Sondyqtan, byltyrǵyǵa qaraǵanda bıyl maqta terim kombaındarynan qıyndyqtar týmaıtynyn aýyl sharýashylyǵy bóliminiń basshysy atap ótti.Jalpy jyl basynan beri maqtaaraldyq dıqandar 414 mıllıon teńgege lızıngke jáne óz qarjylaryna 40 dana ártúrli jańa tehnıkalar satyp alǵan. Munyń bári kúzgi jıyn-terim naýqanynyń sátti ótýine yqpalyn tıgizedi dep kútilýde.