Elimizdiń óńirlerindegi eń úzdik medıtsınalyq mekemeler anyqtaldy
ASTANA. QazAqparat - Densaýlyq saqtaýdy damytý respýblıkalyq ortalyǵy densaýlyq saqtaýdyń damý deńgeıi boıynsha óńirlerdegi medıtsınalyq uıymdardyń jumystaryn baǵalady.
«Úzdikterdiń úzdigi» qaǵıdasyna sáıkes, eń tańdaýly degen medıtsınalyq uıymdar anyqtaldy. Sonymen qatar, úzdik uıymdy anyqtaý ár mekeme túrine bólek-bólek júrgizildi, dep habarlaıdy QR DSM baspasóz qyzmetinen.
Medıtsınalyq uıymdar belgilengen parametrlerge sáıkes baǵalandy. Emhana men aýrýhana, balalar úıi men dıspanserlerde qyzmet kórsetýdiń ózindik erekshelikteri bar. Sondyqtan ár mekemede kórsetiletin medıtsınalyq kómek sapasyn anyqtaýdyń ózindik ólshemderi belgilendi.
Balldardyń qosyndysy boıynsha eresekterge arnalǵan qalalyq kópbeıindi statsıonarlar ishindegi alǵashqy oryndy Aqtóbe qalasyndaǵy Qarǵaly qalalyq aýrýhanasy aldy. ShQO Jarma aýdanynyń №2 medıtsınalyq birlestigi bul tizimdegi sońǵy orynǵa jaıǵasty. Oblystyq aýrýhanalar arasynda eresekterge arnalǵan birde-bir mekeme I,II,III orynǵa qajetti mejelik balldy jınaı almady. Sondyqtan tizim birden IV orynnan bastaldy, bul tuǵyrdan Qyzylorda qalasyndaǵy oblystyq medıtsınalyq uıym kórindi.
Osyndaı jaǵdaı balalarǵa arnalǵan qalalyq jáne oblystyq kópbeıindi statsıonarlar arasynda da baıqalady. Birde-bir medıtsınalyq mekeme alǵashqy úshtikke enbedi. BQO «Balalarǵa arnalǵan kópsalaly aýrýhana» oblystyq aýrýhanalar arasyndaǵy IV orynǵa jaıǵassa, qalalyq aýrýhanalar arasynda IV orynǵa «Temirtaý q. balalarǵa arnalǵan aýrýhanasy» shyqty.
Balalarǵa arnalǵan emhanalar arasynda jınaǵan balldarynyń jetkiliksizdigi saldarynan, Almatydaǵy «№7 qalalyq balalar emhanasy» IV orynǵa ornyqty. Oblystyq jáne qalalyq perzenthanalar ishindegi eń úzdik kórsetkishke BQO perzenthanalary qol jetkizdi.
Ortalyq jumyskerleri medıtsınalyq mekemelerdi baǵalaýmen birge, densaýlyq saqtaýdyń damý ındeksi boıynsha óńirlerde saralaý jumystaryn júrgizdi.
Aıta keteıik, medıtsınalyq uıymdardy baǵalaý jumystaryn ortalyq qyzmetkerleri ár jarty jyl saıyn júrgizip otyrady. Aqparat jurtshylyqty málimettendirý, halyqqa der kezinde, sapaly medıtsınalyq kómek kórsetý, medıtsınalyq uıym menedjmentiniń jaǵdaıyn anyqtaý, patsıentterdiń medıtsınalyq uıymdy erkin tańdaýǵa quqyǵyn júzege asyrý, Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasyn júzege asyrý maqsatynda beriledi.
