Elimizdiń Memlekettik qyzmet isteri agenttigi basqarýshy korpýsty qurý tásilderi men tetikterin pysyqtaýda

Bul týraly búgin atalǵan agenttiktiń basshysy Álıhan Báımenov elordada ótken «Qazaqstanda joǵarǵy basqarý korpýsyn qurýdy qoldaý» taqyrybyndaǵy semınar-keńeste aıtty.

Memlekettiń turaqty ekonomıkalyq ósýi, halyqtyń ómir súrý sapasy men áleýmettik ahýalyn kóterý memlekettik qyzmettiń kadrlyq áleýetine de tyǵyz baılanysty ekendigin atap ótken ol: «Táýelsizdik jyldarynda elimizde memlekettik qyzmettiń qazaqstandyq úlgisi qalyptasty jáne bul qazaqstandyq úlgi halyqaralyq sarapshylar tarapynan joǵary baǵaǵa ıe boldy», - dedi.

Degenmen de onyń aıtýynsha, óskeleń zaman talabyn eskergen Elbasy 2011 jyly memlekettik qyzmet sapasyn arttyrýǵa baǵyttalǵan Qazaqstan Repsýblıkasy memlekettik qyzmetiniń jańa modeliniń tujyrymdamasyn bekitti. Tujyrymdamanyń negizgi baǵyttarynyń biri retinde basqarý elıtasyn, ıaǵnı joǵary basqarýshy korpýsty qurý qarastyrylǵan.

«Bul - álemdik tájirıbe. Atalǵan kadrlyq korpýsty qurýdyń maqsaty arnaıy talapqa saı keletin, strategııalyq josparlaý men basqarý-uıymdastyrý qabiletin meńgergen kadrlar jasaǵyn qalyptastyrý bolyp tabylady. Qazirgi ýaqytta agenttik zań jobasyn daıyndap, basqarýshy korpýsty qurý tásilderi men tetikterin pysyqtaýda», - dedi Á.Báımenov.