Elimizdiń mektepterinde alǵash ret «Erlik sabaqtary» ótedi (FOTO, VIDEO)

ASTANA. QazAqparat - Bıyl 1 qyrkúıek - bilim kúni búkil Qazaqstan boıynsha alǵash ret barlyq mektepter men kolledjderde QR Qorǵanys mınıstrliginiń bastamasymen «Erlik sabaqtary» ótedi, dep habarlaıdy mınıstrliktiń baspasóz qyzmetinen.

Aktsııanyń negizgi maqsattary - patrıottyq sezimge, elimizdiń maqtanyshy bolýǵa, Otandy qorǵaýǵa jáne naǵyz patrıottyń úlgisin qalyptastyrýǵa tárbıeleý. Budan ózge, oqýshylar Qazaqstan tarıhynda aıtýly kúnderdiń maǵynasyn ashatyn «Máńgilik el» ulttyq ıdeıasyn júzege asyrýda qoǵamdaǵy ultaralyq kelisimmen, el tarıhymen, memlekettik rámizdermen, Konstıtýtsııamen tanysady. Osy oraıda arnaıy beınerolıkter men oqý dáristeri ázirlendi.

Bilim kúni respýblıkamyzdyń mektepteri men kolledjderinde «Erlik sabaqtaryn» ótkizý úshin QR Qarýly Kúshterinen barlyǵy 1 300-den asa áskerı qyzmetshi qatysatyn bolady. Sabaqtardy ótkizýge QR QK generaldary, ofıtserleri men serjanttary, sonymen qatar Qorǵanys mınıstriniń orynbasary, QR QK ÁTK bas qolbasshysy, QR QK túrleriniń bas qolbasshylarynyń orynbasarlary, óńirlik qolbasshylyqtar men ásker túrleriniń qolbasshylary, óńirlik qolbasshylyqtar men ásker túrleri qolbasshylarynyń orynbasarlary, sondaı-aq áskerı bólim komandırleri qatysady. Aktsııa respýblıkanyń barlyq óńirin qamtydy.