Elimizdiń mektepteri «E-learning» júıesin engizýge esh daıyn emes - D. Nazarbaeva
ASTANA. 19 qarasha. QazAqparat - Elimizdiń mektepteri «E-learning» elektrondyq oqytý júıesin engizýge esh daıyn emes. Bul negizinen Bilim jáne ǵylym mınıstrligi jumysyndaǵy olqylyq saldarynan týyndap otyr. Búgin Májilistegi Áleýmettik-mádenı damý komıtetiniń keńeıtilgen otyrysynda komıtet tóraıymy Darıǵa Nazarbaeva osylaı málim etti.
Depýtattyń aıtýynsha, elimizdegi mektepterdiń biraz bóliginde ınternet joq. «Materıaldyq-tehnıkalyq qamtamasyz etý de, ınternetti paıdalanýdyń múmkindigi de, tipti mektepterdiń ózi de, jalpy orta bilim beretin búkil ınfraqurylym bundaı baǵdarlamany qabyldap, engizýge ázirshe daıyn emes. Bálkim qalalyq mektepter ázir bolýy múmkin, biraq olar jartysy ǵana. Bul - jalpy bilim mınıstrliginiń jibergen olqylyǵy. Ol elektrondyq baǵdarlamaǵa tapsyrys bergende, osy baǵdarlamalarmen jumys isteıtin kadrlardy da qosymsha daıarlaýy kerek edi», - dedi D.Nazarbaeva. Onyń aıtýynsha, «E-learning» baǵdarlamasymen jumys isteıtin muǵalimderdiń ózi de daıyn emes. Bul rette depýtat mektepterdiń tolyǵymen kompıýterlermen jabdyqtalmaǵanyn, joǵary oqý oryndarynda ondaı mamandar daıarlamaıtynyn alǵa tartady. «Bilim mınıstrligi mamandyqqa muǵalim daıyndaımyn degenshe bes jyl ótedi. Al oǵan bólingen qarajat búgin-aq jumsalyp jatyr tek daıyndyqtyń ózine ondaǵan mıllıard teńge ketken. Mine, depýtattardy ashyndyratyn da osy jaǵdaı, áıtpese baǵdarlamaǵa qarsy emespiz. Baǵdarlama kerek jáne ol mektepterde shynymen de kóptegen problemany sheshedi», - deıdi depýtat.
