Elimizdiń mektep jasyndaǵy birde bir balasy oqýdan tys qalmaýy kerek - Bilim jáne ǵylym mınıstri
ASTANA. Tamyzdyń 13-i. QazAqparat /Marlan Jıembaı/ - Elimizdiń mektep jasyndaǵy birde bir balasy oqýdan tys qalmaýy kerek. Búgin QR oblystary men Almaty, Astana qalalarynyń bilim berý basqarmalary bastyqtarynyń basyn qosyp, jańa oqý jylyna daıyndyq barysy týraly jıyn ótkizgen QR Bilim jáne ǵylym mınıstri Janseıit Túımebaev osyndaı tapsyrma berdi.
Sonymen qatar mınıstr jańa oqý jylynda oqýlyqtarmen qamtamasyz etý máselesine de alańdaýshylyq tanytty. Onyń aıtýyna qaraǵanda, aǵymdaǵy jyly oqýlyqtarmen qamtamsyz etýge jergilikti atqarýshy organdardan qarjy az bólingen. Máselen, byltyrǵy oqý jylynda oqýlyqtarǵa 4 mıllıard 597 mıllıon teńge bólinse, aǵymdaǵy jyly onyń kólemi 70 mıllıon teńgege kem bolyp otyr. Osyǵan oraı J.Túımebaev elimizdiń bilim berý basqarmalary bastyqtaryna bul máseleni jergilikti atqarýshy organdarmen taǵy bir márte pysyqtaýdy surady.
Sóz oraıynda respýblıkalyq «Mektepke jol» aktsııasyna da toqtalǵan mınıstr «Qazirgi tańda 200 myńdaı bala esepke alynyp, olardyń mektep tabaldyryǵyn attaýy úshin qajetti kıimder, oqý quraldary berildi. Oǵan 1 mıllıard teńgedeı qarjy jumsaldy. Bul oraıda 500 mıllıon teńge kóleminde qoldaý kórsetken metsanattarǵa, demeýshilerge alǵysymdy bildiremin», dedi.
