Elimizdiń medıtsına qyzmetkerleri Astanada biliktilikti arttyrý tsıklderinen ótýde
ASTANA. 1 qarasha. QazAqparat - Ústimizdegi jyldyń qazan-jeltoqsan aılarynda Astana qalasynyń Oqý-klınıkalyq ortalyǵynyń bazasynda medıtsına qyzmetkerlerine arnalǵan biliktilikti arttyrý tsıklderi ótkizilýde. Bul týraly Densaýlyq saqtaý basqarmasyna silteme jasap astana.kz habarlady. Búgingi tańda elimizdiń ár óńirinen kelgen 51 dáriger men medıtsına uıymdarynyń mamany oqyp jatyr.
Kýrstar «Densaýlyq saqtaý salasyndaǵy zamanaýı basqarý tehnologııalary (teńdestirilgen kórsetkishter júıesi, joba menedjmenti, resýrsty únemdeý tehnologııalary, kezekterdi meńgerý jáne t.b.)», «Densaýlyq saqtaý salasyndaǵy strategııalyq josparlaý, basqarý jáne bıýdjetteý (qaýip-qaterlerdi basqarý júıesi, korporatıvti basqarý, CQI-PDCA, bıznes-jospar jáne t.b.)», «Medıtsınalyq uıymdardyń statıstıkalyq málimetterin basqarý. MKB 10, 9 boıynsha kodtaý ádistemesi» taqyryptary boıynsha ótip jatyr.
Biliktilikti arttyrý kýrstaryna elimizdiń túkpir-túkpirinen kelgen medıtsınalyq uıymdardyń dárigerleri men mamandary, sonyń ishinde densaýlyq saqtaý uıymdarynyń basshylary, bas dárigerlerdiń orynbasarlary, ishki aýdıt mamandary, qurylymdyq bólimshelerdiń meńgerýshileri qatysýda.
