Elimizdiń kórnekti ǵalymy, jazýshysy Nemat Kelimbetov dúnıeden ótti

Elimizde qalamgerdiń esimi kópshilik oqyrman qaýymǵa álem klassıkteriniń úzdik shyǵarmalaryn qazaq tiline aýdarǵan aýdarmashy retinde jaqsy málim. Ǵalymnyń "Ejelgi túrki poezııasy jáne qazaq ádebıetindegi dástúr jalǵastyǵy", "Qazaq ádebıeti bastaýlary", "Kórkemdik dástúr jalǵastyǵy", "Ejelgi dáýir ádebıeti", "Ejelgi ádebı jádigerlikter" jáne taǵy da basqa irgeli zertteýleri jaryq kórgen. Ǵalymnyń bul baǵyttaǵy izdenisteri ony Kúltegin atyndaǵy syılyqtyń laýreaty atandyrdy, onyń osy taqyryptaǵy kitaptary birneshe shetel tilderine aýdaryldy.

Otyz jasynda omyrtqadan aýyr dertke ushyrap, uzaq jyldar boıy tósekke tańylǵan Nemat Kelimbetovtiń ómirge qushtarlyqtyń ónegesindeı, taǵdyrmen tartystyń taǵylymyndaı «Úmit úzgim kelmeıdi» atty monolog-hıkaıaty onyń qalamgerlik qýatyn da, kúreskerlik kúshin de kelisti kórsetken edi. Keıinnen kitaptiń jelisi boıynsha jazylǵan pesa teatr sahnasynda sahnalandy. Onyń keıingi jyldarda jaryq kórgen «Ulyma hat», «Qarııalar», «Kúnshildik» sııaqty esseleri Nemat Kelimbetovti oıshyl sýretker retinde de tanytty. «Úmit úzgim kelmeıdi» kitaby qazaq ádebıetiniń abyroıyn asyryp, jaqynda ǵana onyń avtoryna ıÝNESKO aıasyndaǵy eń mereıli marapattardyń biri - Eýropanyń Frants Kafka qoǵamynyń nagradasyn alyp bergen edi.

Nemat Kelimbetovtiń kórkem aýdarma salasyna qosqan úlesi de úlken. Ol L.Gýrýntstyń «Shirkin bizdiń Shýshıkent», V.Kozachenkonyń «Naızaǵaı», S.Ahmadtyń «Kókjıek», P.Qadyrovtyń «Juldyzdy túnder» romandaryn tárjimalaǵan.

Nemat Kelimbetov 1937 jyly týǵan. 1953 jyly Ońtústik Qazaqstan oblysynyń Keles óńirindegi Abaı selosynda orta mektep bitirgen soń aldymen Tashkent qarjy-ekonomıka ınstıtýtyn (1959), odan keıin Qazaq ulttyq ýnıversıtetin (1966) aıaqtaǵan. Eńbek jolyn óziniń áýelgi mamandyǵy boıynsha bastaǵan N.Kelimbetov keıinnen jýrnalıstıka, ádebıet salasyna aýysady. «Sotsıalıstik Qazaqstan» (qazirgi «Egemen Qazaqstan») gazetinde ádebı qyzmetker, odan keıin respýblıka Mınıstrler Keńesinde referent, Ádebıet, óner jáne sáýletshilik salalary boıynsha Memlekettik syılyqtar jónindegi komıssııanyń jaýapty hatshysy, «Qazaqstan» baspasynda redaktor qyzmetterin atqarǵan. Fılologııa ǵylymdarynyń doktory, professor N.Kelimbetov kóptegen jyldar boıy Abaı atyndaǵy Almaty memlekettik ýnıversıtetiniń qazaq ádebıeti kafedrasynda, Q.Sátbaev atyndaǵy Qazaq ulttyq ýnıversıtetiniń qazaq tili kafedrasynda ustazdyq etken.

Jazýshymen qoshtasý jeltoqsannyń 16-sy kúni, saǵat 10-da Jambyl atyndaǵy Qazaq fılormanııasy ǵımaratynda bolady.