Elimizdiń qorǵanys salasy zamanaýı deńgeıde
ASTANA. QazAqparat - 7 mamyr - Otan qorǵaýshylar kúni. Dúnıede Otannan artyq qasterli sóz joq. «Otan úshin otqa tús, kúımeısiń» degen Baýyrjan Momyshuly babamyz. Qazaqstan azattyq alǵannan keıin qorǵanys salasy jańadan qalyptasty. Búginde ol aıbarly uǵymǵa aınaldy. Muzdaı qarýlanǵan áskerimiz sap túzedi.
Qazirgi tańda elimizdiń qorǵanys salasynyń áleýeti kúsheıdi. Álem boıynsha 52-shi orynǵa kóterildi. Árıne, onyń bári - el mereıi. Biraq soǵan jetý úshin qanshama ter tógildi. Qorǵanys salasyna qajetti qarý-jaraqtar men tehnıkalardy shyǵaratyn iri kásiporyndardyń irgesi qalandy. Osy rette elimizdiń áskerı áleýetin arttyrý baǵytynda QR Qorǵanys jáne aeroǵarysh ónerkásibi mınıstrligi júıeli jumys júrgizip jatqanyn aıtýǵa tıispiz. Búginde áskerı ónimderdi daıyndaıtyn kásiporyndardyń bári de «Qazaqstan ınjınırıng» UK» AQ-tyń quramyna kiredi.
Aldymen elordada qazyǵyn qaqqan úsh kásiporynǵa toqtalaıyq. «Qazaqstan Paramaýnt Injınırıng» kompanııasy qorǵanys kúshterin aldyńǵy qatarly tehnıkalarmen jabdyqtaıdy. Negizinen, «Arlan», «Nomad», «Barys» atty brondyq kólikterdi shyǵarady. Olardyń barlyǵy da ýaqyt talabyna tolyq jaýap beredi. Mınaǵa qarsy qorǵanysy myqty. Kez kelgen atys qarýlaryna shydaıdy. Onda syrtqy jáne ishki baılanys radıostansasy ornatylǵan. Saǵatyna 100-120 shaqyrymdy alady. Klımattyq jaǵdaıǵa beıimdelgen. Búginde bul brontransporterler kóptegen memleketterdiń qyzyǵýshylyǵyn týǵyzýda. Álemdik naryqqa da qabiletti.
Odan keıin bas qaladaǵy «Eýrokopter Qazaqstan ınjınırıng» kásipornynda qurastyratyn ES-145 tikushaqtaryn aıtýǵa bolady. Bul - TMD kóleminde osyndaı tikushaqtar qurastyratyn jalǵyz zaýyt. Kásiporyn jylyna keminde 8-10 tikushaq shyǵarady. Olardyń bári de memlekettik qurylymdarda paıdalanylady. Sóıtip, Qazaqstan óz tarıhynda áskerı tikushaqtar qurastyratyn elge aınaldy. Al elordadaǵy úshinshi kásiporyn... Ony keıin baıandaımyz. Ony ózimiz baryp, kózimizben kórdik.
Sondaı-aq, Almaty oblysynda radıolokatsııalyq tehnıka óndiretin «Granıt-Tales Elektronıks» zaýytyn aıtsaq deımiz. Osyndaı joba qazaqstandyq áskerdiń qajettiligin, sondaı-aq osy óńirlerdegi memleketterdi qamtamasyz etý úshin Orta Azııada alǵash ret júzege asyryldy. Elimizde óndiriske josparlanǵan radıolokatsııalyq stansalar óziniń tehnıkalyq sıpattamasy boıynsha radıolokatsııalyq barlaýǵa jáne áýe keńistigin baqylaýǵa arnalǵan álemdegi eń úzdikterdiń biri sanalady.
Batys Qazaqstan oblysynyń ortalyǵy Oral qalasyndaǵy «Zenıt» Oral zaýyty» kásiporny jýyrda №4 «Mańǵystaý» zymyrandy-artıllerııalyq kemesin Kaspıı teńizine túsirýin júzege asyrdy. Bul kásiporynnyń memlekettik qorǵanys tapsyrysyna sáıkes jasalǵan 26-shy kemesi. Zaýyttan shyǵatyn kemelerdiń bári jańa júıemen jabdyqtalǵan. «Petropavl aýyr mashına jasaý zaýyty» AQ zaman talabyna saı jańǵyrtylǵan ZÝ-23-2 zenıttik qondyrǵysyn shyǵarady. Jańǵyrtylǵan ZÝ-23-2 zenıttik qondyrǵysy tómen bıiktikti áýe nysanalarymen - áýe shabýylynyń zamanaýı quraldarymen kúres júrgizýge, sonyń ishinde ushaqtarmen, tikushaqtarmen, qanatty zymyrandarmen jáne qashyqtyqtan basqarylatyn ushatyn apparattarymen urysty júrgizýge múmkindik beredi. Al «Semeı ınjınırıng» kásiporny brondy tank qarý-jaraǵy men tehnıkalaryn daıyndaý jáne olardy jóndeý jumystarymen aınalysady. Bir sózben aıtqanda, bulardyń bári de otandyq brendke aınalǵan ónimder dep aýyz toltyryp aıta almyz.
Tujyryp aıtqanda, elimizdiń qorǵanys salasynyń qanaty qataıyp, bıiktep keledi. Ásirese, osy baǵyttaǵy óz ónimderimizdiń sapalylyq jaǵynan álemdik deńgeıge kóterilýi - úlken maqtanysh. Birtúrli kóńilińizdi qýanysh kerneıdi. Basqany qaıdam, ózime solaı kórindi.
