Elimizdiń kóptegen aımaqtarynda sot aktileriniń oryndalý jaǵdaılary talapqa saı emes - Joǵarǵy sot ókili
ASTANA. Shildeniń 9-y. QazAqparat /Aıdar Ospanalıev/ - Sot qyzmetiniń sapasy kóptegen faktorlarmen baılanysty. Sonyń ishinde sot aktileriniń oryndalýyn erekshe ataýǵa bolady.
Al bizdiń elimizdiń sot aktileriniń oryndalýyn qadaǵalaý jumystary barlyq aımaqtarda birdeı talapqa saı emes. Óz kezeginde ol qylmyskerlerdiń jazadan jaltaryp ketý jaǵdaılaryna ákelip soǵýda. Bul týraly búgin elimizdiń sot júıesiniń jarty jyldyq qorytyndysyna arnalǵan Joǵarǵy sot sýdıalarynyń jalpy otyrysynda Joǵarǵy sottyń Qylmystyq isterdi baqylaý alqasynyń tóraǵasy Aqyltaı Qasymov málim etti.
Onyń aıtýynsha, Almaty qalasy Medeý aýdandyq sotynyń azamat Álibaevqa qatysty shyǵarǵan úkimi osy máselege jarqyn mysal bola alady. «Onda aýdandyq sot Álibaevty bas bostandyǵynan aıyrý jóninde úkim shyǵaryp, ony sot zalynda tutqynǵa almaǵan. Al appelıatsııalyq sot aýdandyq sottyń úkimin kúshinde qaldyrǵan. Alaıda olar da úkimniń oryndalýy úshin tıisti sharalar qoldanbaǵan. Nátıjesinde sottalǵan Álibaev boı tasalap, qazir oǵan halyqaralyq izdeý jarııalandy. Mundaı áreketter sot organdaryna abyroı ápermeıdi», dedi A.Qasymov.
