Elimizdiń kóliktik-logıstıkalyq júıelerin damytý alǵa qoıyldy
ASTANA. 4 mamyr. QazAqparat - Qazaqstan Respýblıkasy Kólik jáne kommýnıkatsııa mınıstri Berik Kamalıev kóliktegi logıstıkany uıymdastyrý máseleleri boıynsha mamandandyrylǵan Strategy Partners,
AECOM jáne Lancaster Infrastructure sheteldik kompanııalary konsýltanttarynyń eki tobymen kezdesýler ótkizdi, dep habarlady vedomstvonyń baspasóz qyzmeti.
Prezıdent N. Nazarbaevtyń Úkimet múshelerimen, ákimdermen, ortalyq memlekettik organ basshylarymen birge ótkizilgen keńeıtilgen májiliste qoıǵan tapsyrmasyna oraı, kóliktik logıstıkany damytý máselelerine búginde erekshe kóńil bólinip otyr. Osy arqyly elimizdiń tranzıttik áleýetin arttyryp, taýar, jumys kúshi jáne adamdardyń kedergisiz qozǵalysyna barynsha qoldaý kórsetý kózdelýde.
Kólik vedomstvosynyń basshysy ótkizgen kezdesýlerdiń basty taqyryby Qazaqstannyń kóliktik-logıstıkalyq júıelerin damytý, osy baǵytta qalyptasqan sheteldik tájirıbeni eskere otyryp tujyrymdamany daıyndaý máseleleri boldy.
Aldaǵy ýaqyttaǵy qysqa merzimdi mindetterdiń biri 2010-2014 jyldarǵa arnalǵan QR Kóliktik ınfraqurylymyn damytý boıynsha baǵdarlamanyń «QR kóliktegi logıstıkalyq júıesin damytý» bólimine engizý úshin jańa tujyrymdama men jalpy jospardy ázirleý bolyp tabylady. Osyǵan oraı, ózara baılanysty birqatar mindetterdi júzege asyrý qajet. Dálirek aıtqanda, bul - jobany qarjylandyrý máselerinen bastap, marketıngtik zertteýler júrgizý, kóliktegi logıstıkany damytý sharalary týraly júıelik qujatty daıyndaý jáne ony júzege asyrýǵa deıingi mindetter.
