Elimizdiń kólik prokýratýrasy Investıtsııalar mınıstrligin aıyptady
ASTANA. QazAqparat - QR Bas kólik prokýrory Marat Álıhanov elimizdiń Investıtsııalar jáne damý mınıstrligin temirjol stansalaryndaǵy qaýipsizdikti qamtamasyz etýdegi áreketsizdigi úshin aıyptady, dep habarlaıdy QazAqparat.
Temirjol boıynda adamdardyń qaýipsizdigin qamtamasyz etýdegi zańdylyqtyń jaı-kúıi máseleleri jónindegi keńeste málim etilgen derekterge qaraǵanda, sońǵy 10 jylda temirjol boıynda 1100-den astam adam jaraqattanyp, onyń 700-i qaza tapqan. Ókinishke oraı olardyń arasynda balalar da bar. Sońǵy bes jylda 50 bala qaza bolǵan. Aǵymdaǵy jyldyń ózinde 71 tótenshe oqıǵa tirkelip, sonyń saldarynan 52 adam kóz jumǵan.
«Túbegeıli sharalardy birlesip ázirleý qajettigi pisip-jetildi. Olaı bolmaǵan jaǵdaıda bul problema ýshyǵa beredi. Ulttyq operator bul saladaǵy shynaıy jaǵdaıdy bilmeıdi. Eldi mekenderge taqaý 400-ge jýyq stansa men ýchaskede qorshaý joq. Munan bólek, temirjol arqyly qaýipsiz ótkel barlyq jerde bar emes. Bul adamdardyń sanaly túrde bastaryn qaterge tigip, ruqsat etilmegen jerden joldy kesip ótýge ıtermeleıdi», - dedi Marat Álıhanov.
Onyń aıtýynsha, «Qazaqstan temir joly» kompanııasy óziniń shyǵystaryn qysqartý maqsatynda temirjol stansalary aýmaǵyn kúzetýden bas tartqan.
«ıAǵnı, stansalyq nysandardyń ne qorshaýy, ne kúzeti joq. Bul jaǵdaıdyń qaıǵyly saldary, adam ólimi de bar. Qazirgi ýaqytta zańnama QTJ-ǵa atalǵan nysandardy kúzetpen qamtamasyz etýdi mindettemeıdi. Osylaısha, aqsha únemdeýmen adam ómiri arasynda tańdaý tur. Kún saıyn qaýipti júkterge qyzmet kórsetetin stansa nysandarynyń strategııalyq maqsatyn da esten shyǵarmaǵan jón. Lańkestikke qarsy qorǵanys turǵysynan alyp qaraǵanda bul baǵyt ashyq-shashyq jatyr. Osy salaǵa ókiletti memlekettik organ Investıtsııalar jáne damý mınıstrligi áreketsiz otyr. Biz bul máseleni ókiletti organ men QTJ aldynda birneshe márte kótergen edik. Alaıda, qazirgi ýaqytqa deıin atalǵan jaǵdaıdy túzetýge baǵyttalǵan qandaı da bir is-shara qolǵa alynǵan emes», - dedi elimizdiń Bas kólik prokýrory.
