Elimizdiń Kólik mınıstrliginde Esil ózenindegi qaýipsizdik sharalary qaraldy
ASTANA. 26 maýsym. QazAqparat - Kólik jáne kommýnıkatsııa mınıstrliginde Kóliktik baqylaý komıtetiniń, Astana qalasy ákimdiginiń, elordalyq ishki ister jáne tótenshe jaǵdaılar departamentteriniń, «Esil - Astana» MKQK ókilderiniń, qaıyqty jalǵa berý beketteri ıeleriniń qatysýymen Esil ózeninde qaýipsizdikti qamtamasyz etý máselesine arnalǵan jınalys bolyp ótti.
Vedomstvo baspasóz qyzmetiniń aqparatyna qaraǵanda, bas qosýda aǵymdaǵy navıgatsııalyq kezeńde Esil ózeninde qaýipsizdikti qamtamasyz etýmen qatar, Astana qalasynyń kúni qarsańynda qaýipsizdik sharalaryn kúsheıtý máselesi de sóz boldy.
Qazirgi ýaqytta Astanada «Keme júretin Esil» atty joba júzege asyrylýda. Bul joba júzege asyrylǵan jaǵdaıda keme júretin ishki jalpy sýlardyń kólemi 24 shaqyrymdy quraıtyn bolady. Búgingi ýaqytta ózenniń keme júretin bóligi 6 shaqyrymdy qurap otyr.
Salystyrmaly túrde kólemi az bólikte kemelerdiń qozǵalys qarqyny qaýipsizdikti kúsheıtýdi talap etedi. Ásirese, mereke kúnderi Esil ózeniniń qalalyq ýchaskesinde halyqtyń shoǵyrlanýy arta túsedi. Osyǵan oraı qaýipsizdik qamtamasyz etýge qatysty bar barlyq qyzmetter kelise otyryp, óz kúshterin biriktirýi qajet.
Jınalysqa qatysýshylar statsıonarlyq aılaqtar, qalalyq jaǵajaı, jaıaý júrginshiler kópiri men jaǵalaýlar sekildi adamdar kóp jınalatyn jerlerdi baqylaýǵa alyp, kemelerge minip, túsý qaýipsizdigin qamtamasyz etý týraly sheshim qabyldady.
Sondaı-aq, barlyq qyzmetterge qoldanystaǵy kemelerdiń tehnıkalyq jaǵdaıyna, olardyń jolaýshylardy tasymaldaý normalaryn saqtaýyna, kemelerdiń qutqarý quraldarymen qamtamasyz etilýine baqylaýdy kúsheıtý týraly tapsyrma berildi.
