Elimizdiń qolarba bıshileri álem chempıonatyna joldama aldy
NUR-SULTAN. QazAqparat - Nıderlandynyń Keık qalasynda ótken qolarba bıshileri arasynda álem chempıonatyna lıtsenzııa berý halyqaralyq týrnıri aıaqtaldy. Elimizdiń qorjynynda jalpy sany 14 medal bar. Bul týraly elordalyq múmkindiginen aıyrylǵan sport mektebiniń qoǵammen baılanys bóliminiń basshysy Karına Dúısenova QazAqparat tilshisine bergen suhbatynda málim etti.
Qolarbaǵa tańylǵan jandar arasynda bıden ótetin álem chempıonatyna lıtsenzııa berý týrnıri osy jyldyń 19-21 sáýir kúnderi ótti. Oǵan álemniń 15 elinen 85 úmitker qatysty. Álemdik bı básekesinde el namysyn qorǵaǵan qazaqstandyq komanda quramynda Nur-Sultan, Shymkent qalalary jáne Almaty men Qaraǵandy oblystarynyń sportshylary bar.
«Biz halyqaralyq zamanaýı jáne sporttyq bı júıesine sáıkes daıyndaldyq. Árıne biraz ter tógýdi talap etti, óz basym jattyqtyrýshy retinde nátıjege rızamyn. Bizdiń komanda barlyq sany 14 medal ıelendi. Onyń ishinde elordalyq qolarba bıshileriniń ózi halyqaralyq týrnırden 7 júldeni qorjyndaryna saldy, onyń 3-i kúmis, 4-i qola medal. Bizdiń basty qarsylastarymyz Ýkraına men Belarýs elderiniń ókilderi boldy. Qobaljyǵanymyz ras, degenmen báseke bastalǵanda qorqynysh ózdiginen seıildi. Naǵyz báseke alda, bıden álem chempıonatyna aty aıtyp turǵandaı úzdikter jınalady. Bizde bir ǵana maqsat bar daıyndyqty kúsheıtip, aıtýly básekede elimizdiń namysyn laıyqty túrde qorǵaý», - dedi Qazaqstan Respýblıkasyna eńbegi sińgen jattyqtyrýshy Álııa Túsipbekova.
