Elimizdiń keıbir aımaqtaryndaǵy balalar demalatyn lagerlerdegi qaýipsizdik sharalary talapqa saı bolmaı shyqty
ASTANA. Tamyzdyń 9-y. QazAqparat - Prokýratýra organdaryn elimizdegi balalar lagerlerindegi jaǵdaı alańdatyp otyr.
Bas prokýratýra taratqan málimetterge qaraǵanda, bıylǵy aptap ystyqtyń zardaby aýyl sharýashylyǵyna ǵana tıip qoıǵan joq. Mı qaınatyp, bas aınaldyrǵan kúnniń qyzýynan qan qysymy joǵary adamdar men júreginiń derti bar naýqastar dalaǵa shyǵýdan qaldy. Bul, ásirese, jazǵy demalysyn eldi mekenderde ótkizetin balalardyń ata-analary úshin qıyndyq týdyrdy. Kúnniń ystyǵynnan qashyp, ózen men kólderge shomylýǵa ketetin jetkinshekterdiń qaýipsizdigine alańdaǵan ata-analary balalarynan kóz jazyp qalmaý úshin, bilim berý mekemeleriniń janynan ashylǵan lagerlerge berýde. Alaıda, sol mektep janynan ashylǵan lagerlerdyń jaǵdaıynyń ózi alańdaýshylyq týdyrýda.
Osyǵan oraı Almaty oblysynyń prokýratýrasy, aýdandyq tótenshe jaǵdaılar, memlekettik sanıtarlyq-qadaǵalaý salasy mamandarymen birlesip, osy aımaqtyń Eskeldi aýdanyndaǵy bilim berý mekemeleriniń janynan ashylǵan lagerlerde balalar quqyqtarynyń saqtalýyna, 2006-2010 jyldarǵa arnalǵan jazǵy demalys kezeńinde balalar
men jasóspirimderdiń demalysyn, saýyqtyrylýyn jáne panasyz qalýynyń aldyn alý zańdylyqtaryna tekseris júrgizgen.
Tekserý barysynda mektep janyndaǵy lagerlerge aýdan boıynsha barlyǵy 22 mektepten 1 myń 640 oqýshynyń tartylǵandyǵy anyqtaldy. Alaıda Almaty oblysy men basqa da qalalarǵa jazǵy demalysty ótkizý úshin lagerlerge oqýshylardyń joldanbaǵandyǵy, pánder boıynsha salalyq lagerler men sporttyq-saýyqtyrý lagerleriniń ornalaspaǵandyǵyn anyqtaldy. Tipti órt qaýipsizdigi erejelerine atústi qaraǵan Şestakov, Kóktóbe, Jastar aýylyndaǵy orta mektepterdiń sharýashylyq jónindegi orynbasarlaryna, 7 myń 65 teńge mólsherinde aıyppul salyndy. Sondaı-aq «Jiger» palatalyq lagerin tekserý barysynda «Balalardyń saýyqtyrý uıymdarynyń qurylymyna jáne jumysyn uıymdastyrýǵa qoıylatyn sanıtarlyq-epıdemıologııalyq talaptardyń» erejege saı bolmaı shyqqandyǵy anyqtaldy.
