Elimizdiń keıbir aımaqtarynda jumyssyzdyqpen baılanysty kórsetkishter qoldan jaqsartylyp otyr- Bas prokýratýra
ASTANA. Tamyzdyń 12-i. QazAqparat /Aıdar Ospanalıev/ - Bas prokýratýra turǵyndardy jumyspen qamtý máselesin basty nazarda ustap otyr.
Osy baǵytta arnaıy tekserý jumystaryn júrgizgen olar elimizdiń keıbir aımaqtarynda jumyssyzdyqpen baılanysty kórsetkishterdi qoldan jaqsartý áreketteriniń oryn alyp otyrǵandyǵyn anyqtady. Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov aıtty.
Onyń derekteri boıynsha, Mańǵystaý oblysynyń Qaraqııa aýdanynda eńbekpen qamtý jáne áleýmettik baǵdarlamalar bóliminde jumyssyzdardy tirkeıtin qosymsha jýrnaldyń bolǵandyǵy anyqtaldy. Ondaǵy málimetter resmı málimetter bazasynda kórsetilmegen. «Osylaısha jumyssyzdardyń qatarynda 50 adam tizimge engizilmeı qalǵan. Tap osyndaı jaǵdaı Mańǵystaý oblysynyń Beıneý aýdanynda da oryn alǵan. Onda 62 adam resmı tizimnen tys qalǵan. Prokýratýra qoldanǵan sharalar negizinde azamattardyń buzylǵan quqyqtary qalpyna keltirilip, kináli azamattar jaýapqa tartyldy», dedi resmı ókil.
