Elimizdiń keıbir aımaqtarynda mektep oqýshylaryna kórsetiletin medıtsınalyq qyzmetter kitaphanada júrgizilgen
ASTANA. Aqpannyń 4-i. QazAqparat /Aıdar Ospanalıev/ - Prokýrorlar ótken jyly áleýmettik salada negizinen áleýmettik jaǵynan az qamtylǵan otbasynyń balalaryna nazar aýdarǵan. Bul jumystar ásirese kámeletke tolmaǵandardyń quqyqtary men múddelerin qorǵaýǵa baǵyttaldy.
Bul másele jóninde búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov baıandap berdi, dep habarlaıdy QazAqparat.
Onyń sózine qaraǵanda, prokýratýra qyzmetkerleri jalpyǵa birdeı bilim berý oryndaryndaǵy oqýshylardyń medıtsınalyq qyzmet kórsetýge baılanysty quqyqtarynyń saqtalýyna júrgizilgen tekserýdi aıaqtady. «Arnaıy ruqsat qaǵazynsyz jumys júrgizý, bilikti mamandardyń joqtyǵy, medıtsınalyq qural-jabdyqtarmen tolyq qamtamasyz etilmeý, sanıtarlyq talaptardyń oryndalmaýy tekserý barysynda anyqtalǵan eń kóp zańsyzdyqtar. Tekserý barysynda keıbir mektepterde medıtsınalyq qyzmet kórsetý jumystarynyń múldem uıymdastyrylmaǵandyǵy anyqtaldy. Tek Shyǵys Qazaqstan oblysyndaǵy 246 mektepte medıtsınalyq tirekter joq bolyp shyqty. Al medıtsınalyq qyzmet bilim berý jumysyna ruqsat beretin negizgi qujattardyń biri», dedi resmı ókil.
Onyń aıtýynsha, mektepterdegi bar medıtsınalyq tirekterdiń ózi talapqa saı emes. Oral qalasynda tekserilgen 42 oqý ornynyń tek
14-i ǵana belgilengen normatıvterge saı bolyp shyqty. Al keıbir aımaqtarda medıtsınalyq qyzmet kórsetetin orynnyń bolmaýy sebepti bul qyzmetter muǵalimder bólmesi men kitaphanalarda kórsetilgen.
