Elimizdiń qaı óńirlerinde jumyssyzdar kóp

ASTANA. QazAqparat – 2023 jyldyń birinshi toqsanynda eldegi jumyssyzdyq deńgeıi 4,8 paıyzdy qurady. Onyń aldyndaǵy toqsanmen salystyrǵanda kórsetkish ózgergen joq, biraq byltyrǵy birinshi toqsanǵa qaraǵanda sál tómendedi, dep habarlaıdy QazAqparat Finprom.kz zertteýine silteme jasap.

Jumyssyzdar sany bir jylda 0,1% artyp, 2023 jyldyń birinshi toqsanynda 453,5 myń adamdy qurady.

Aıta ketý kerek, aýyldarda (4,9%) jumyssyzdyq deńgeıi qalaǵa (4,7%) qaraǵanda joǵary. Bul rette bir jyl burynǵy jaǵdaı ózgerip otyr, ıaǵnı qaladaǵy (5%) jumyssyzdyq deńgeıi aýylmen (4,8%) salystyrǵanda joǵary boldy.

Qaladaǵy jumyssyzdar sany bir jylda 0,9% artyp, 278,7 myń adamǵa jetse, aýylda 1,2% azaıyp, 174,8 myń adamdy qurady.

Qazaqstan óńirleriniń jartysynda jumyssyzdyq deńgeıi ortasha respýblıkalyq deńgeıden joǵary boldy. Eń joǵary kórsetkishter Jetisý, Qyzylorda, Mańǵystaý jáne Túrkistan oblystarynda tirkeldi: árqaısysynda 5 paıyzdan boldy. 20 óńirdiń altaýynda bul kórsetkish elimiz boıynsha ortasha deńgeıden tómen. Eń tómeni Qaraǵandy jáne Ulytaý oblystarynda belgilendi, ıaǵnı bul oblystarda 4,2% shamasynda baıqaldy.

Qaladaǵy jumyssyzdyqtyń eń joǵary deńgeıi 2023 jyldyń birinshi toqsanynda Jetisý oblysynda (5,3%), sondaı-aq Abaı jáne Jambyl oblystarynda (árqaısynda 5,1%) baıqaldy. Eń az deńgeıi Ulytaý (4%), Aqmola (4,3%) jáne Qaraǵandy (4,3%) oblystary qalalarynda tirkeldi.

Aýyldaǵy jumyssyzdyqtyń eń joǵary deńgeıi Mańǵystaý oblysynda boldy – 5,5%. Odan keıingi orynda Aqmola jáne Shyǵys Qazaqstan oblystary (árqaısysynda 5,2%), sondaı-aq Aqtóbe oblysy (5,1%) tur.

Jumyssyzdyqtyń az deńgeıi Qaraǵandy oblysynyń aýyldarynda baıqaldy, ıaǵnı 3,7% shamasynda. Odan keıingi oryndarda Pavlodar (4,2%) jáne Abaı (4,3%) oblystary.

Sonymen qatar áıelder (5,4%) arasyndaǵy jumyssyzdyq deńgeıi erlerge (4,2%) qaraǵanda joǵary boldy.

Óńirlik turǵyda erler arasyndaǵy jumyssyzdyqtyń eń joǵary deńgeıi Qyzylorda oblysynda anyqtaldy – 5%. Odan keıingi orynda Atyraý (4,9%.) oblysy tur. Osy rette jumyssyzdyqtyń az deńgeıi Mańǵystaý (2,4%) jáne Shyǵys Qazaqstan (2,8%) oblystarynda baıqaldy.

Qazaqstan óńirlerinde áıelder arasynda jumyssyzdyq deńgeıi Qaraǵandy oblysyndaǵy 4,4%-dan Mańǵystaý oblysyndaǵy 8%-ǵa deıin jetti.

Aıta ketý kerek, aýyldaǵy erler (3,9%) arasyndaǵy jumyssyzdyq deńgeıi qalaǵa (4,5%) qaraǵanda tómen boldy. Óńirler boıynsha erler arasyndaǵy eń kóp jumyssyzdyq Atyraý (5,3%) jáne Aqmola (5,2%) oblystarynyń aýyldarynda, eń az deńgeıi Abaı (1,3%) jáne Mańǵystaý (2%) oblystarynda anyqtaldy. Qalada erler arasyndaǵy jumyssyzdyqtyń eń joǵary deńgeıi Abaı oblysynda (7,3%), eń azy Shyǵys Qazaqstan oblysynda (2%) belgilendi.

Budan bólek, aýylda áıelderdiń (6,1%) jumyssyzdyq deńgeıi qalamen (5%) salystyrǵanda joǵary boldy. Aýylda áıelder arasyndaǵy jumyssyzdyqtyń eń joǵary deńgeıi Mańǵystaý oblysynda baıqaldy – 9,9%. Odan keıingi orynda Abaı oblysy (7,9%). Aýyldaǵy áıelder jumyssyzdyǵynyń eń az deńgeıi Pavlodar oblysynda tirkelip, 4,5%-dy quraıdy. Qaladaǵy áıelder jumyssyzdyǵynyń joǵary kórsetkishi Shyǵys Qazaqstan oblysynda (6,9%), sondaı-aq Jetisý jáne Túrkistan oblystarynda (árqaısynda 6,3%), al eń azy Abaı oblysynda (2,6%) tirkeldi.