Elimizdiń Kásipodaqtar federatsııasy koronavırýspen kúreske birqatar aktıvin usyndy
NUR-SULTAN. QazAqparat - Elimizdiń Kásipodaqtar federatsııasy koronavırýspen kúreske birqatar aktıvin usyndy. Bul týraly QR Kásipodaqtar federatsııasy tóraǵasynyń birinshi orynbasary Satybaldy Dáýletalın Facebook-paraqshasynda jazdy, dep habarlaıdy QazAqparat tilshisi.
«Qandaı qıyn-qystaý zaman týsa da Qazaqstanymyz, Kásipodaq federatsııalary barlyq ýaqytta da halyqpen búkil qıyndyqty birge bólisip, jeńiske jetip keledi. Elimiz úshin osynaý qıyn sátte Qazaqstan Respýblıkasynyń Kásipodaqtar federatsııasy memleket qajettiligi úshin koronavırýstiń taralýymen kúreske myndaı aktıvterin usynýǵa sheshim qabyldady: Almaty qalasyndaǵy «Kóktem» shıpajaıy, Nur-Sultan qalasyndaǵy «Týrıst» qonaqúıi jáne qajettilik týyndaǵanda Aqmola oblysyndaǵy «Şýche» shıpajaıy. Búginniń ózinde ol jerlerde karantınge jiberilgen shamamen 1 myń adam jatyr», - dedi ol.
Sonymen qatar Satybaldy Dáýletalın barlyq otandastarymyzdy bekitilgen qaýipsizdik sharalaryn ustanyp, azamattyq jaýapkershilik tanytýǵa shaqyrady.
«Birlesken is-áreketterimiz azamattarymyzdyń ómiri men densaýlyǵyn saqtap qalýǵa septigin tıgizetindigine senimdimiz. Biz birge jeńemiz! #BIZBIRGEMIZ», - dedi federatsııa tóraǵasynyń birinshi orynbasary.
