Elimizdiń Qarýly kúshterinde koronavırýsqa qarsy revaktsınatsııa jalǵasýda

NUR-SULTAN. QazAqparat – Qazaqstan áskeriniń 13 myńǵa jýyq áskerı qyzmetshisi men azamattyq personalyna qaıta ekpe salyndy. Medıtsınalyq turǵyda qarsy kórsetilimi bar adamdarǵa ǵana vaktsına egilmeıdi, dep habarlaıdy QazAqparat QR Qorǵanys mınıstrliginiń resmı saıtyna silteme jasap.

«Qorǵanys mınıstrliginiń áskerı emhanalary jáne tirkelgen jerindegi azamattyq emdeý mekemeleri, sondaı-aq áskerı jáne azamattyq emdeý mekemeleriniń kóshpeli egý brıgadalary belsendiligi joıylǵan vaktsına arqyly revaktsınatsııa júrgizedi», – dep atap ótti QR QK Bas áskerı-medıtsınalyq basqarmasynyń bastyǵy medıtsına qyzmetiniń polkovnıgi Tımýr Oshaqbaev.

Qazaqstannyń bas sanıtar dárigeriniń revaktsınatsııa júrgizý týraly qaýlysyna sáıkes COVID-19 qarsy ekpeniń tolyq kýrsynan keıin alty aı ótkende qaıta ekpe salý qajet.

Bas áskerı-medıtsınalyq basqarmasy el Qarýly kúshterindegi koronavırýs ınfektsııa boıynsha epıdemıologııalyq ahýal ujymdyq ımmýnıtettiń qalyptasýynyń arqasynda turaqty ekenin atap ótti.