Elimizdiń ishki kóshi-qon máselesine erekshe kózqaras bolǵan jón - professor pikiri

Búgin Astanada ótken Qazaqstandaǵy kóshi-qon máselelerine arnalǵan konferentsııada professor Tynyshtyq Qaldybaeva osylaı aıtty.

«Elimizdiń basqa aımaqtarynan kelgen azamattarǵa tek óz múddesin sheship, tabys kórý úshin ǵana kelgender retinde qaramaý kerek. Olardy Astananyń bolashaq azamaty, elordanyń keleshek kelbeti dep esepteý qajet-aq. Sebebi olar eńbek resýrsy ǵana emes, sonymen qatar bilim men mádenıettiń resýrsy da bola alady. Árıne, Astanaǵa kelgenderdiń barlyǵyna da birden jaǵdaı jasaý qıynǵa soǵar. Biraq elordamyzdyń damý strategııasynda bul óte zor oryn alatyn másele dep oılaımyn», - deıdi T.Qaldybaeva.

Sondaı-aq óz sózinde ǵalym elimizdiń ındýstrııalyq-ınnovatsııalyq damý baǵdarlamasy aıasynda Astanada kásibı daıyndyǵy joǵary jas mamandardy shoǵyrlandyrý máselesin erekshe atap ótti. «Olardyń turǵyn-úı jaǵdaıyn sheshý jolynda qoljetimdi jataqhanalardy kóbirek salý qajet. Ondaı tájirıbe Keńes úkimeti kezinde bolǵan. Bul Astananyń qaýipsizdigi úshin de asa qajet. Sebebi búginde qalanyń shet aımaqtarynda baspana jaldap júrgen azamattardy baqylaý qıyn. Ol jerlerde qylmystyq oqıǵalardyń jıi oryn alýy da osydan. Al arzan ári qoljetimdi shaǵynaýdandardy salý arqyly biz birinshiden, jas mamandardy turǵyn-úımen qamtamasyz etsek, ekinshiden, elordadaǵy qoǵamdyq qaýipsizdikti baqylaýda ustaı alamyz», - dep atap kórsetti T.Qaldybaeva.