Elimizdiń ishki ister organdarynan 10,6 myń shtattyq birlik qysqarady
NUR-SULTAN. QazAqparat - Elimizdiń ishki ister organdarynan 10,6 myń shtattyq birlik qysqartylatyn bolady. Bul jaıynda QR Іshki ister mınıstrliginiń baspasóz qyzmetinen málim etti, dep habarlaıdy QazAqparat tilshisi.
«2019-2021 jyldarǵa arnalǵan ishki ister organdaryn jańǵyrtý jol kartasyna sáıkes aǵymdaǵy jyly 10,6 myń shtattyq birlik qysqartyldy. Ol jetispeıtin jáne artyq basqarýshylyq laýazymdardy qysqartý esebinen júzege asyryldy. QR ІІM qaramaǵyna 596 qyzmetker shyǵarylyp, olar búgingi kúni jumysqa ornalastyryldy», - dep atap ótedi vedomstvodan.
Mınıstrlik málimetine qaraǵanda, vedomstvoda júrgizilgen ońtaılandyrý nátıjesi normatıvtik turǵyda ǵana bekitilgen.
«Bul úshin Úkimet qaýlysynyń jobasy ázirlenip, «Quqyqtyq aktiler týraly» Zańǵa sáıkes ashyq normatıvtik quqyqtyq aktiler ınternet-portalyna ornalastyryldy. Munan ózge qysqartý josparlanyp otyrǵan joq», - deıdi mınıstrlik baspasóz qyzmetinen.
