Elimizdiń halyqaralyq rezervteri 94 mlrd dollardan asty

ASTANA. QazAqparat – Elimizdiń halyqaralyq rezervteri 94 mlrd dollardan asty. Bul týraly búgin Úkimet otyrysynda Ulttyq bank tóraǵasynyń orynbasary Vıtalıı Týtýshkın aıtty, dep habarlaıdy QazAqparat tilshisi.

«Jalpy halyqaralyq rezervter shilde aıynyń sońynda 94,4 mlrd dollar boldy. Ulttyq banktiń altyn-valıýta rezervteri shilde aıynda 34,2 mlrd dollarǵa deıin 0,8 paıyzǵa tómendedi. Ulttyq qordyń aktıvteri 60,2 mlrd dollarǵa deıin 0,7 paıyzǵa ulǵaıdy. Ulttyq qordan respýblıkalyq bıýdjetke 2,4 trln teńgege transfertter bólý úshin jyl basynan bastap Ulttyq qordyń 4,1 mlrd dollarǵa valıýtalyq aktıvteri satyldy. Qorǵa jyl basynan bastap túsken jıyntyq qarajat – 2,7 trln teńge», - dedi ol.

Vıtalıı Týtýshkınniń aıtýynsha, Ulttyq bank syrtqy jáne ishki naryqtardaǵy jaǵdaıdyń damý barysyn qadaǵalap, makroekonomıkalyq turaqtylyqty qamtamasyz etýge jáne ınflıatsııany odan ári tómendetýge baǵyttalǵan tıisti is-sharalardy qabyldaýdy jalǵastyrady.