Elimizdiń halyqaralyq qoryndaǵy altyn úlesi 47 paıyzǵa jýyqtady
ASTANA. QazAqparat - Qazaqstannyń jalpy halyqaralyq qoryndaǵy altyn úlesi 46,5 paıyzǵa qurady, dep habarlaıdy QazAqparat tilshisi Energyprom.kz saıtyna silteme jasap.
«Ótken jyldyń qorytyndysynda eldiń jalpy halyqaralyq qory 31 mlrd dollardy qurady. Bul 2017 jylmen salystyrǵanda 15,1 paıyzǵa kóp. Onyń 46,5 paıyzyn (14,4 mlrd dollar) altyn quraıdy. Salystyrmaly túrde aıtar bolsaq, osydan bir jyl buryn altyn úlesi nebári 40,3 paıyzdy qurap, al bes jyl buryn 77,5 paıyz erkin konvertatsııalanatyn shetel valıýtasy boldy», - delingen jarııalanǵan aqparatta.
Memleket elimizdiń altyn-valıýta qoryn tazartylǵan altyn quımalarymen toltyra otyryp, Qazaqstanda shyǵarylatyn barlyq altyndy satyp alýda.
Aıta keterligi, respýblıkada óndiriletin altynnyń bir kóligi halyqqa da satylyp jatyr. Máselen, osy ýaqytqa deıin ekinshi deńgeıli bankter arqyly jalpy salmaǵy 166,9 keli bolatyn 4 myńnan astam shaǵyn altyn quımalary satyldy. Ótken jylǵy qarasha aıynyń sońynan beri valıýta aıyrbastaý oryndarynyń da shaǵyn altyn quımalaryn satýǵa múmkinshiligi bar. Sol ýaqytta ulttyq bank salmaǵy 12-13 keli bolatyn altyn quımalardy satylymǵa shyǵaratyndyǵy belgili bolǵan edi. Ony jeke jáne zańdy tulǵalar satyp ala alady.
Altyn quımalaryn álemdik naryqta da satýǵa jol ashylyp otyr. Ulttyq bank aǵymdaǵy jyldan bastap baǵaly metaldy kommertsııalyq saýda seriktesterine satýǵa daıyn. Degenmen, onyń kólemi shekteýli, 5 tonnadan aspaıdy.
Dúnıejúzilik altyn keńesiniń derekterine sáıkes, Qazaqstannyń altyn qory 341,2 tonnany (álemde 15-orynda) quraıdy. Bul 2017 jyldyń sońyndaǵy kólemnen shamamen 50 tonnaǵa, al 2016 jylǵy kólemnen 83 tonnaǵa kóp.
