Elimizdiń faýnasyna arnalǵan «Qoqıqaz» atty 500 teńgelik shaqa aınalymǵa shyqty
ASTANA. Qańtardyń 25-i. QazAqparat - QR Ulttyq banki elimizdiń faýnasyna arnalǵan 500 teńgelik shaqany aınalymǵa shyǵardy.
Monetanyń nysany sopaqsha. Bet jaǵynyń (aversinde) ortasynda monetanyń nomınalyn bildiretin «500 TEŃGE» degen jazýy bar. Nomınaldyń tómengi jaǵynda moneta daıyndalǵan metaldy, onyń synamasyn jáne massasyn bildiretin «Ag 925 24 g» degen jazý, monetanyń soǵylǵan jylyn bildiretin «2009» degen san jazylǵan. Joǵarǵy bóligin aınaldyra memlekettik tilde «QAZAQSTAN ULTTYQ BANKІ» degen jazý men Qazaqstan Teńge saraıynyń taýar belgisi bar. Monetanyń tómengi bóliginde kóbelektiń stıldendirilgen kontýrly sýreti jáne ósimdikter kompozıtsııasy beınelengen.
Monetanyń syrt jaǵynyń (reversinde) ortasynda eki qoqıqaz, kún dóńgelene beınelengen jáne qustyń sý betinde shaǵylysqan keskini golografııalyq tásilmen beınelengen. Joǵarǵy bóliginde aınaldyra memlekettik tilde «QOQIQAZ» jáne latyn tilinde «PHOENICOPTERUS Roseus» - túrdiń ataýy jazylǵan.
Monetanyń betki jáne syrt jaǵyndaǵy beıneler men jazýlar bederlenip jazylǵan. Qyry (gýrt) bederli.
Moneta 925 synamaly kúmisten, massasy - 24 gramm, sopaqtyǵy - 38,61 h 28,81 mm., «proof» sapasymen daıyndalǵan, taralymy - 4 myń dana. Nomınal aınalymǵa 2009 jylǵy jeltoqsannyń 25-inde shyqty.
