Elimizdiń elektrondyq úkimetti damytý reıtıngi ósti

ASTANA. QazAqparat - Qazaqstan elektrondyq úkimetti damytýda aldyńǵy qatarly elder tizimine endi. Bul týraly Ulttyq bıýronyń osy jyldyń 8 aılyq jumysyn qorytyndylaýǵa arnalǵan baspasóz máslıhatynda Memlekettik kórsetiletin qyzmetter departamentiniń dırektory Ildar Úısimbaev málim etti, dep habarlaıdy QazAqparat tilshisi.

«Aqparattyq júıelerdi yqpaldastyrý jáne memlekettik kórsetiletin qyzmetterdi avtomattandyrý maqsatynda memlekettik organdardyń derekter qoryn yqpaldastyrý jumystary júrgizilip jatyr», - dedi Ildar Úısimbaev.

Úkimetpen birlesip atqarylǵan jumystyń nátıjesinde «elektrondyq úkimet» portalymen yqpaldastyq 18%-ǵa artty, óz kezeginde ótken 10 jylda ol tek 12%-dy quraǵan. 

Qazirgi ýaqytta 452 qyzmet azamattarǵa elektrondyq nysandy qoljetimdi, bul tizilimdegi qyzmetterdiń jalpy sanynyń 60,6%-yn quraıdy. 2018 jyly usynylǵan 60,5 mln qyzmettiń 55%-y «elektrondyq úkimet» portaly arqyly, 23%-y memlekettik korporatsııa arqyly, 22% qaǵaz túrinde kórsetildi.

«Memlekettik kórsetiletin qyzmetterdi elektrondyq formatqa jedel kóshirý boıynsha belsendi jumysty aıta ketken jón. Bul osy saladaǵy turmystyq jemqorlyqtyń deńgeıin 75%-ǵa deıin azaıtty. 2018 jylǵy BUU reıtıngine sáıkes Qazaqstan elektrondyq úkimetti damytý ındeksinde (UN GlobalE-Government Development Index) 193 memleket ishinde 39-shy oryndy ıelendi, al Azııa elderi arasynda 8-shi orynǵa jaıǵasty. Bul kórsetkish óz kezeginde elimizdiń elektrondyq úkimetke kóshý deńgeıi men qyzmet kórsetý sapasynyń artqandyǵyn kórsetedi», - dedi Memlekettik kórsetiletin qyzmetter departamentiniń dırektory.