Elimizdiń ekonomıkasyn, ekologııasyn jáne jalpy ulttyq qaýipsizdigin aeroǵaryshtyq monıtorıng júıesi arqyly damytý qajet - Senator B. Jylqyshıev
ASTANA. Qazannyń 14-i. QazAqparat /Qanat Mámetqazyuly/ - Elimizdiń ekonomıkasyn, ekologııasyn jáne jalpy ulttyq qaýipsizdigin aeroǵaryshtyq monıtorıng júıesi arqyly damytý qajet. Búgin QR Parlamenti Senatynyń jalpy otyrysynda Úkimet basshysynyń atyna depýtattyq saýal joldaǵan senator Bolat Jylqyshıev osylaı málim etti.
«Senattyń Agrarlyq máseleler jáne qorshaǵan ortany qorǵaý komıtetine Qazaqstan Respýblıkasynyń Ekonomıkalyq qylmysqa jáne sybaılas jemqorlyqqa qarsy kúres agenttiginen usynys kelip tústi. Qazirgi tańda turaqtylyqty qamtamasyz etý, memlekettik jáne qoǵamdyq múddelerdiń negizgi salalaryn odan ári damytý, olardy júzege asyrý sharalary tıimdi joldardy qoldanýdy qajet etedi. Osy baǵytta elimizdiń ekonomıkasyn, ekologııasyn jáne jalpy ulttyq qaýipsizdigin aeroǵaryshtyq monıtorıng júıesi arqyly damytý máselesin qarastyrý usynylady. Keleshekte aýyl sharýashylyq salalarynyń damýyna, tabıǵı ortanyń durys paıdalanýyna baǵyttalǵan mańyzdy aqparatty ortalyqtandyratyn júıeli túrdegi aeroǵaryshtyq monıtorıngtiń óte tıimdi ekeni eshqandaı kúmán keltirmeıdi. Mundaı aqparattyń mańyzdylyǵy - ony burmalaýǵa nemese jasyrýǵa baǵyttalǵan áreketterden táýelsiz bolýyna, sýbektilerdiń zańdy tártipte áreket etýine, bıýdjetke tólemderdiń túsýine durys yqpalyn tıgizedi», - dedi komıtet tóraǵasy senator Bolat Jylqyshıev.
Onyń aıtýynsha, atalǵan sharalardy iske asyrý úshin tıisti normatıvtik quqyqtyq aktini qabyldaý Qazaqstan Respýblıkasy Úkimetiniń quziretine jatady. Sondyqtan, depýtat Úkimet basshysynan qoldaý surady.
