Elimizdiń birneshe aımaǵynda respýblıkalyq «Qazaqstan Barysy» týrnırine qatysatyn bas balýandar anyqtaldy
ASTANA. 6 mamyr. QazAqparat - «Qazaqstan Barysy» týrnırine irikteý kezeńiniń úshinshi aınalymy aıaqtalyp keledi. Búginde, elimizdiń birneshe aımaǵy bas balýandaryn anyqtady. Bul týraly «Qazaqstan barysy» qazaq kúresin damytý qorynyń baspasóz qyzmetinen habarlandy.
Beıbitteı batyrymen maqtanatyn Jambyl oblysy da júzden júırik shyǵyp, toptan ozǵan balýandaryn anyqtady. Taraz qalasynda ótken oblystyq syndaǵy «Túıe balýandar» saıysyna jalpy esebi 26 balýan qatysqan edi. Oblystaǵy mamandar men bapkerler qaýymy salmaǵy aýyr Jasulan Ábishev, Baqtııar Sultanbek syndy talantty sportshylarǵa fınal joldamasy buıyrýy múmkin degen boljam aıtty. Biraq, kilemde bári basqasha órbidi. Talas aýdanynyń týmasy, dzıýdodan Qazaqstan ulttyq quramasynyń múshesi Dáýlethan Jaqypov barlyq qarsylastaryn aıla qaldyrmaı jeńdi. Salmaǵy 82 keli tartatyn Dáýlethan Jambyldaǵy alyptardyń biri Jasulan Ábishovti jartylaı fınalda súrindirdi. Onyń aldynda Dáýlethannan áldeqaıda aýyr Baqtııar Sultanbek bolashaq chempıonǵa jol bergen edi. Fınalda Talas aýdanynyń eki ókiliniń joly túıisti. Óte tartysty ótken beldesýde 108 keli salmaǵy bar Aıdos Dáýlethan Jaqypovty taǵy da jeńe almady. Taǵy deýimizdiń sebebi joq emes. Talas aýdanynda ótken fınalda osy eki balýan beldesip, sol kezde de Dáýlethannyń mereıi ústem bolǵan. Osylaısha, salmaǵy jeńil bolsa da, ádis aılasy kóp Dáýlethan «Taraz barysy» atandy. Dáýlethanǵa týrnırdi uıymdastyrýshylar 150 myń teńge kóleminde syıaqy men teledıdar usyndy. Endi Dáýlethan men Aıdos respýblıkalyq synda baq synaıdy.
Jambylmen kórshiles jatqan Shymkent óńirinde Nazar Ersultanovtyń aıy ońynan týdy. Jetisaı aýdanynda ótken oblystyq týrnırdiń fınalynda salmaǵy 158 keli tartatyn, «Qazaqstan Barysyndaǵy» eń alyp balýan Nazarǵa eshkim qarsylyq kórsete almady. Ońtústiktiń úmitin arqalap, respýblıkalyq fınalǵa ekinshi oryn ıegeri Samat Esen de qatysady.
Al, Astana qalasynda Ǵanı Seıdildaev ekinshi márte úzdik shyqty. Byltyr «Qazaqstan barysynyń» fınalynda beldesken tájirıbeli balýan qarsylastaryn taza jeńip, mártebeli týrnırdiń aqtyq aıqasyna joldama aldy. Ǵanıdan bólek, jas balýan Ashat Ýálıev te Astana namysyn qoldan bermeýge tyrysady.
