Elimizdiń birqatar óńirlerindegi joldarda kólik qozǵalysy shekteldi
ASTANA. QazAqparat - Aýa raıynyń kúrt nasharlaýyna baılanysty elimizdiń birqatar óńirlerinde joldar jabyldy, dep habarlaıdy QR ІІM Tótenshe jaǵdaılar komıtetinen.
Qaraǵandy oblysynda qar, boran, kóktaıǵaqqa baılanysty avtokóliktiń barlyq túrleri úshin «Qalqaman-Baıanaýl-Botaqara» tas jolynyń (0-93 km); «Ekaterınbýrg-Almaty» tas jolynyń ýchaskesinde (885-1007km) júk jáne jolaýshy kólikteriniń qozǵalysy toqtatyldy. «Qyzylorda-Pavlodar» ýchaskesinde (970-1066 km) barlyq kólik túrleriniń júrýine tyıym salyndy. «Almaty-Ekaterınbýrg» (1037-1142 km) tas jolynyń ýchaskesinde júk jáne jolaýshy avtokólikteri úshin qozǵalys toqtatyldy.
Astana qalasy boıynsha «Astana-Pavlodar», «Astana-Kókshetaý», «Astana-Qaraǵandy» tas joldarynyń ýchaskesinde barlyq avtokólik túrlerine qozǵalys toqtatyldy. Pavlodar oblysynda boranǵa, kóktaıǵaqqa oraı «Astana-Ermentaý-Shiderty» tas joly (205-259 km) ýchaskelesinde; «Qalqaman-Maıkaıyń-Baıanaýl» (0-138 km) a/j ýchaskesinde; «Lenın-Ertis-Rýsskaıa polıana» a/j ýchaskesinde barlyq avtokólik túrlerine qozǵalys toqtatyldy. Aqmola oblysynda (boran, joldyń nashar kórinýi, kóktaıǵaq) «Astana-Pavlodar shekarasyna deıin» a/j (16-205 km); «Ekaterınbýrg-Almaty» (1275-1353 km) ı «Astana-Qorǵaljyn» (19-169 km) ýchaskelerinde barlyq avtokólik túrleri úshin qozǵalys toqtatyldy; «Ekaterınbýrg-Almaty» tas jolynda (1275-1353 km) júk jáne jolaýshy kólikteriniń qozǵalysyna tyıym salyndy. Shyǵys Qazaqstan oblysynda keshki saǵat 20-00-den bastap aýa raıynyń nasharlaýyna baılanysty «Shemonaıha-Reseı shekarasy» (105-123 km) jolynyń ýchaskesinde barlyq kólik túrleriniń qozǵalysy toqtatyldy.
