Elimizdiń birqatar óńirinde jol jabyldy
NUR-SULTAN. QazAqparat – Elimizdiń birqatar aımaǵynda jol jabyldy, dep habarlaıdy QazAqparat Tótenshe jaǵdaılar komıtetiniń baspasóz qyzmetine silteme jasap.
25 jeltoqsan kúni saǵat 09:30-dan bastap Aqmola oblysynda aýa raıynyń qolaısyzdyǵyna baılanysty (jaıaý burqasyn, joldyń kórinbeýi) «Nur-Sultan - Ereımentaý - Shiderti» (16-200 shaqyrym) baǵyttarynda barlyq kólik túrlerine qozǵalys shekteldi.
Shyǵys Qazaqstan oblysynda búgin saǵat 12:50-den bastap jol kórinbeıtin aqtútek boranǵa baılanysty «Óskemen - Shemonaıha – RF shekarasy» (105-123 shaqyrymy) baǵytynda jol jabyldy.
25 jeltoqsan saǵat 11:00-den bastap aýa raıynyń qolaısyzdyǵyna baılanysty «Qyzylorda - Pavlodar» (1206-1135 shaqyrymy) baǵyttarynda barlyq kólik túrleri úshin qozǵalys shekteldi.
Keshe, 24 jeltoqsan saǵat 11:00-den bastap qatty boranǵa baılanysty «Maıqaıyń-Ekibastuz» baǵytyndaǵy jol jabylǵan bolatyn.
TJ komıteti azamattarǵa aýa raıy ózgeristerin baqylaýda ustap, qolaısyz aýa raıynda alysqa jolǵa shyqpaý jóninde keńes beredi.
