Elimizdiń birqatar óńirinde jol ashyldy

NUR-SULTAN. QazAqparat - Aýa raıynyń jaqsarýyna baılanysty birqatar joldarda kólik qozǵalysy qaıta jandandy, dep habarlaıdy QazAqparat Indýstrııa jáne ınfraqurylymdyq damý mınıstrligine silteme jasap.

Atap aıtqanda, «Samara - Shymkent» avtojolynyń Josaly aýylynan Tań eldimekenine deıingi 1645-1702 shaqyrymynda kóliktiń júrýine ruqsat berildi. Sondaı-aq, «Ekaterınbýrg - Almaty» tasjolynyń Soltústik Qazaqstan oblysynyń shekarasynan Jaqsy aýylyna deıingi 856-917 shaqyrymynda, sonymen qatar osy avtojoldyń Chıstopole eldimekeninen bastap Aqmola oblysynyń shekarasyna deıingi 853-856 shaqyrymynda jol ashyldy.

Degenmen, aýa raıynyń qolaısyzdyǵyna baılanysty «Qyzylorda - Pavlodar» jolynyń 1066-1135 shaqyrymy (Molodejnyı aýylynan Pavlodar oblysynyń shekarasyna deıin) men Qaraǵandy oblysynyń shekarasynan Bozshakól eldimekenine deıingi 1135-1242 shaqyrymynda kólik qozǵalysyna tyıym salynǵan.

Aıta keteıik, qazirgi ýaqytta respýblıkalyq mańyzy bar joldarda 701 tehnıka jumys istep jatyr.

Barlyq suraqtar boıynsha 1403 nómirindegi baılanys ortalyǵyna habarlasýǵa bolady.