Elimizdiń birqatar óńirinde jergilikti ókiletti organdardaǵy áıelder ókildigi 30 paıyzǵa jetip qaldy - G.Ábdiqalyqova

ASTANA. QazAqparat - Elimizdiń birqatar óńirinde jergilikti ókiletti organdardaǵy áıelder ókildigi 30 paıyzǵa jetip qaldy. Bul týraly búgin Qazaqstan Respýblıkasynda 2006-2016 jyldarǵa arnalǵan genderlik teńdik strategııasyn iske asyrýdyń aldyn ala qorytyndylaryna arnalǵan halyqaralyq konferentsııa barysynda elimizdiń Memlekettik hatshysy Gúlshara Ábdiqalyqova aıtty.

«Táýelsizdik jyldarynda elimizde erler men áıelderdiń teń quqyǵy men múmkindikterin qamtamasyz etý, otbasy rólin nyǵaıtý, ana men balaǵa qamqorlyq jasaý, áıelder qaýymyna qoldaý kórsetý sııaqty ıgilikti ister júıeli júzege asyrylýda. Búgingi alqaly basqosýda osy baǵytta atqarylǵan aýqymdy jumystardyń eleýli salasyna jan-jaqty toqtalatyn bolamyz. Sonymen, barshańyzdy QR-daǵy genderlik teńdik strategııasyn iske asyrýdyń aldyn ala qorytyndylaryn talqylaý jónindegi halyqaralyq konferentsııaǵa qosh keldińizder, demekpin», - dedi jıyndy ashqan Memlekettik hatshy.
Onyń atap ótýinshe, strategııany iske asyrý jyldarynda Qazaqstan eleýli nátıjelerge qol jetkizgen. Máselen, búginde Parlament Májilisindegi áıelder úlesi 27,1 paıyzǵa jetip otyr. Al bul kórsetkish 2006 jyly 10,4 paıyz bolǵan edi. Sonymen qatar, barlyq deńgeıdegi máslıhattarda áıelder ókildiginiń deńgeıi 2006 jylǵy 16,7 paıyzdan búginde 22,2 paıyzǵa jetti.
«Birqatar óńirlerde, atap aıtqanda, Pavlodar, Soltústik Qazaqstan jáne Batys Qazaqstan, Aqtóbe, Atyraý oblystarynda jáne Almatyda jergilikti ókiletti organdarda áıelder ókildigi 30 paıyzǵa jetip qaldy. Bul rette eń joǵarǵy kórsetkish Qostanaı oblysynda 31,6 paıyz ekendigin atap ótken oryndy», - dedi G.Ábdiqalyqova.