Elimizdiń birqatar óńirinde qoǵam qaıratkerlerine eskertkish ornatylady
«Keshe Ulttyq akademııalyq kitaphanada Monýmenttik óner qurylystaryn ornatý jónindegi komıssııa otyrysy ótti. Jıynda monýmentaldy óner salasyndaǵy sarapshylarmen kóptegen ózekti máseleni talqyladyq. Otyrysta maquldanǵandaı, aldaǵy ýaqytta Qostanaı oblysynyń Torǵaı aýylynda Alash qaıratkerleri Ahmet Baıtursynuly men Mirjaqyp Dýlatulynnyń eskertkishteri boı kóteredi. Sondaı-aq Almaty qalasynda Ahmet Baıtursynulyna eskertkish jáne teatr qaıratkeri Jumat Shanınge bıýst ornatylady», - dep jazdy mınıstr Facebook-paraqshasynda.
Onyń atap ótýinshe, belgili músinshiler, sýretshiler, zergerler, ǵalymdar men qoǵam qaıratkerleri quramyna kiretin Monýmentaldy óner qurylysyn ornatý jónindegi komıssııa respýblıkalyq konkýrstyń qorytyndysy boıynsha jobalaý jumystaryn qarap, óz pikirlerin ortaǵa saldy.
«Eskertkishter – bizdiń tarıhı jadymyzdy jańǵyrtýda jáne qoǵamdyq sanany qalyptastyrýda erekshe mánge ıe. Sondyqtan josparlaýdan bastap eskertkishterdi ornatqanǵa deıingi jumysqa muqııat qaraýymyz qajet. Komıssııa toby músinderdiń jumsaq materıaldan jasalǵan tolyq kólemdegi nusqasyn jan-jaqty qarastyrýy tıis. Sondaı-aq, Komıssııa músheleri Jambyl, Qaraǵandy, Qostanaı, Túrkistan jáne Ulytaý oblystary ákimdikteriniń ıdeıalyq usynystaryn biraýyzdan qoldady. Atalǵan óńirlerde Qazaqstannyń Halyq jazýshysy Sherhan Murtazaǵa, aqyn, memleket jáne qoǵam qaıratkeri Kákimbek Salyqovqa, Nııaz batyr Saıdaly Barqyulyna, ekinshi dúnıejúzilik soǵys jáne eńbek ardageri Jaqsybek Ońshybaevqa, sondaı-aq túrik saıasatkeri, memleket qaıratkeri Adnan Menderske arnalǵan eskertkishterdi jobalaý josparlanyp otyr», - dedi Dáýren Abaev.
