Elimizdiń birqatar dárigerleri Bergamo qalasyndaǵy kardıohırýrgııalyq ortalyqtan tájirıbe jınaqtap qaıtty
ALMATY. Qańtardyń 18-i. QazAqparat /Ádilet Musahaev/ - Búgin Bergamo (Italııa) qalasyndaǵy kardıohırýrgııalyq ortalyqta tájirıbe jınaqtap kelgen Syzǵanov atyndaǵy Ulttyq ǵylymı hırýrgııa ortalyǵynyń dárigerleri baspasóz máslıhatyn ótkizdi,
dep habarlaıdy QazAqparat.
Atalmysh dárigerler tobynyń bilimderin jetildirý úshin jasaǵan is-saparlary «Aıala», «Dara» sııaqty qaıyrymdylyq qorlary qaýymdastyǵy men «Úı» qoǵamdyq qorynyń qoldaýymen júzege asyp otyr.
Dárigerler Italııada alǵan tájirıbelerimen bólise otyryp, elimizdegi balalar kardıohırýrgııasynyń damýyna qandaı úles qosa alatyndary jaıynda áńgime qozǵady. «Búgingi tańda, Qazaqstanda týa bitken júrek aqaýymen aýyratyn balalardyń tek 2 paıyzyna ǵana operatsııa jasalýda. Ol tek Astana qalasynda iske asady, onyń ózinde biz 10 kelige jetpeıtin balalarǵa operatsııa jasaı almaımyz. Al elimizde, bul operatsııanyń jasalýyna muqtaj bolyp ómirge keletin sábılerdiń sany 3-5 myńǵa jetedi. Sondyqtan biz ol jaqtan balalarǵa qalaı jáne qandaı tásilmen operatsııa jasaý kerektigin úırendik. Endigi kezekte alǵan bilimimizdi, jınaqtaǵan tájirıbemizdi elimizdegi balalarǵa kómektesý arqyly kórsetpekpiz», deıdi anestezıolog dáriger Jandos Dáýletbekov.
