Elimizdiń birqatar aımaqtarynda uıymdasqan qylmystyq toptar quryqtaldy
ASTANA. Mamyrdyń 19-y. QazAqparat /Aıdar Ospanalıev/ - Qyzylorda oblysynda eldi mekenderden shalǵaı ornalasqan aımaqtardaǵy munaı qubyrlarynan ónim urlaýmen aınalysyp júrgen qylmystyq top quryqtaldy.
Urylar memleketke 6 mıllıonnan astam teńgege shyǵyn keltirgen. Bul týraly búgin jýrnalıstermen bolǵan baspasóz máslıhatynda Іshki ister mınıstrliginiń Krımınaldyq polıtsııa komıtetiniń tóraǵasy Sultan Kúsetov málim etti, dep habarlaıdy QazAqparat.
Onyń derekterine qaraǵanda, Aqtóbe oblysynyń Qandyaǵash stansysynda Almaty men Qyzylorda oblysynyń turǵyndary ustalǵan. Tekserý barysynda málim bolǵanyndaı, olar 3 tsısterna urlanǵan shıki munaıdy satpaq bolǵan. Munaıdy olar Qyzylorda qalasynan jalǵan qujattar arqyly tasymaldap kelgen. «Mańǵystaý oblysynda 5 adamnan qurylǵan qylmystyq top músheleri quryqtaldy. Olar atys qarýyn paıdalana otyryp Ýkraına men Túrikmenstannan keletin aýyr júk kólikterin tonaýmen aınalysyp júrgen. Al Ońtústik Qazaqstan oblysynda eldegi bankterdiń operatsııalyq zaldarynyń birinen alaıaqtyq arqyly 30 mıllıonnan astam teńgeni jymqyryp ketken qylmystyq top quryqtaldy», dedi komıtet tóraǵasy.
