Elimizdiń birqatar aımaqtarynda boranǵa baılanysty kólik joldary jabyldy
ASTANA. 19 jeltoqsan. QazAqparat - Respýblıkanyń birqatar aımaqtarynda alaı-dúleı boran soǵýyna baılanysty avtokólikter úshin joldar jabyldy, dep habarlaıdy QR TJM baspasóz qyzmetinen.
Astana qalasynda jáne Aqmola oblysynda aýa raıynyń qolaısyzdyǵyna baılanysty (burqasyn soǵýy, kórý múmkinshiliginiń nasharlaýy) avtokólikter úshin barlyq baǵyttaǵy joldar jabyldy.
Aqtóbe oblysynda boranǵa baılanysty "Aqtóbe-Orsk" avtokólik jolynyń 21-135 shaqyrymynda, "Embi-Shalqar" avtokólik jolynyń 91-257 shaqyrymynda barlyq avtokólik túrleri úshin jol jabyldy.
Qaraǵandy oblysynda Temirtaý qalasy - Aqmola oblysynyń shekarasy aralyǵyndaǵy "Almaty-Ekaterınbýrg" avtokólik jolynda, Qaraǵandy qalasy - Pavlodar oblysynyń shekarasy aralyǵyndaǵy "Qyzylorda-Pavlodar" avtokólik jolynda barlyq avtokólik túrleri úshin jol jabyldy.
Pavlodar oblysynda 19 jeltoqsan saǵat 01:20-dan bastap "Shiderti-Ereımentaý-Astana", "Shiderti-Qaraǵandy" avtokólik joldary jabyq.
