Elimizdiń birde bir qalasynda turmystyq qaldyqtardy óńdeý júıesi jolǵa qoıylmaǵan
ASTANA. 19 naýryz. QazAqparat - Elimizdiń birde bir qalasynda turmystyq qaldyqtardy óńdeý júıesi jolǵa qoıylmaı keledi.
Búgin QR Parlamenti Májilisindegi Úkimet saǵatynda Qurylys jáne turǵyn úı kommýnaldyq-sharýashylyq isteri agenttiginiń tóraǵasy Serik Nokın osylaı málim etti.
«Qatty turmystyq qaldyqtar máselesi elimiz úshin ózekti problemaǵa aınalyp otyrǵany ras. Ókinishke qaraı, bizde bul baǵyttaǵy tájirıbemiz kóńil kónshitetin emes. Máselen, Almaty qalasynda bir jylǵa jýyq qoqys óńdeý zaýyty jumys istep, keıinnen toqtap qalǵany bar. Sonymen birge, qazir bizdiń bir de bir qalamyzda, bir de bir oblysy ortalyǵynda qoqys óńdeýge qatysty birizdi, jolǵa qoıylǵan tıimdi júıe qalyptaspaǵan», - deıdi Serik Nokın. Onyń aıtýynsha, agenttik osy máseleni tereń zerdelep shyqqan. Sonyń negizinde 2020 jylǵa deıin 41 qalada qatty turmystyq qaldyqtardy óńdeý júıesin engizý kózdelgen.
«Bul jumysqa keshendi qadam kerek. Óıtkeni, árbir ákim jergilikti jerden óz kúshimen máseleni sheshkisi kelgenimen, odan ońdy nátıje shyǵyp jatqan joq. Biz osy jumysqa brendti kompanııalardyń keńesshilerin shaqyrtýdamyz. Osy baǵytta kelesi jyly elimizdiń 8 qalasynda turmystyq qaldyqtardy óńdeý júıesin engizý úshin tehnıkalyq negizdeme jasalmaq. Buǵan bıýdjetten qoldaý jasaldy», - dedi agenttik basshysy.
