Elimizdiń batys óńirlerindegi joldar ashyldy - «Qazaqavtojol» RMK
ASTANA. 15 naýryz. QazAqparat - Búgin tańerteń elimizdiń batys óńirlerindegi joldar ashyldy.
Bul jaıynda «Qazaqavtojol» RMK baspasóz qyzmeti habarlady.
Atap aıtqanda,keshe qatty boranǵa baılanysty «Chapaev-Jalpaqtal-Qaztalovka-RF shekarasy» jolynyń 0-123 shaqyrymynda, sondaı-aq «Qaztalovka-Jánibek-RF shekarasy» avtojolynyń 0-162 shaqyrymynda kólikterdiń jolǵa shyǵýyna shekteý qoıylǵan bolatyn.
Sonymen qatar, Astana ýaqytymen keshe saǵat 16:30-dan beri «Atyraý-Oral» jolynyń 189-492 shaqyrymyndaǵy Oral-Atyraý oblysy shekarasy aralyǵy, budan bólek «Oral-Kamenka-RF shekarasy» jolynyń 0-104 shaqyrymynda kólikterdiń jolǵa shyǵýyna tyıym salynǵan edi.
Al keshe saǵat 17:00-den bastap «Samara-Shymkent» avtojolynyń 261-526 shaqyrymyndaǵy Oral-Aqtóbe oblysy shekarasy aralyǵynda da kóliktiń barlyq túrleri úshin jol jabyldy.
Budan basqa, Aqtóbe oblysy aýmaǵyndaǵy «Qobda eldimekeni-BQO shekarasy» jolynyń 526-615 shaqyrymynda da kólik qozǵalysy shektelgen edi.
Bul joldar qardan tazartylǵannan keıin búgin tańǵy saǵat 8:30-dan bastap avtojoldardaǵy kólik qozǵalysy qalypty tártipte júzege asyryla bastady.
QR Kólik jáne kommýnıkatsııa mınıstrliginiń «Qazaqavtojol» RMK-da avtomobıl joldarynyń jabylǵan ýchaskeleri jóninde halyqty habardar etý úshin táýlik boıy dıspetcherlik qyzmeti (7172) 444-777 baılanys telefonymen jumys isteıdi. Budan bólek, joldar jónindegi shuǵyl aqparat www.mtk.gov.kz jáne www.kazavtodor.kz saıttarynda jarııalanady.
