Elimizdiń batys óńirine qosymsha 700 jartylaı vagon bólinedi

NUR-SULTAN. QazAqparat – Elimizdiń batys óńirine qıyrshyq tas tasymaldaý úshin qosymsha 700 jartylaı vagon bólý josparlanǵan. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Júk vagondaryn jalǵa alý jáne olarmen operatsııalar júrgizý qyzmetteri básekeles ortada jáne naryqtyq qaǵıdattar negizinde júzege asyrylady. Qazirgi ýaqytta respýblıka boıynsha 300-ge jýyq qazaqstandyq vagon operatorlary jumys isteıdi. Olardyń teńgeriminde 135 myńnan astam vagon, onyń ishinde 64 myń jartylaı vagon bar. Sonymen birge, osy jylǵy birinshi toqsannyń qorytyndysy boıynsha respýblıkanyń batys óńirinde 1 243 myń tonna qıyrshyq tasty (18 myń jartylaı vagon) tıeýdiń josparly kólemi kezinde 634 myń tonnadan astam qıyrshyq tas (9 myń jartylaı vagon) jóneltildi», - dedi Úkimet basshysy jaýabynda.

Onyń atap ótýinshe, jospardy oryndamaýdyń negizgi sebebi - júk jóneltýshilerdiń tólemniń bolmaýyna baılanysty ótinimderden bas tartýy.

«Búgingi kúni batys óńirde qıyrshyq tas tasymaldaýǵa 2 300-den astam jartylaı vagon tartylǵanyn, sondaı-aq qosymsha 700 jartylaı vagon bólý josparlanyp otyrǵanyn atap ótý qajet. Jartylaı vagondar parkiniń sany júkterdi tasymaldaý josparynyń málimdelgen kólemin qamtamasyz etýge jetkilikti. Osylaısha, Batys Qazaqstan oblysynyń avtomobıl joldaryn kúrdeli jóndeý jáne salý jobalaryn iske asyrý úshin vagondarmen ýaqtyly qamtamasyz etý boıynsha barlyq qajetti is-sharalar qabyldanýda», - dedi Álıhan Smaıylov.