Elimizdiń batys óńirindegi nan baǵasynyń turaqtylyǵyn saqtaý maqsatynda soltústik aımaqtaǵy elevatorlardy bosatý jumystary júrip jatyr
ASTANA. Tamyzdyń 16-sy. QazAqparat /Rýslan Ǵabbasov/ - Azyq-túlik korporatsııasynda 3,4 mln tonna azyq-túlik ónimderine arnalǵan astyq bar. Bul týraly búgin Úkimette ótken keńeste Aýyl sharýashylyǵy mınıstrliginiń jaýapty hatshysy Evgenıı Aman aıtty.
«Qazirgi kezde Azyq-túlik korporatsııasynda 3,4 mln tonna azyq-túlik ónimderine arnalǵan astyq bar. Onyń ishinde 1 mln. tonnasy memlekettiki, al qalǵan 2,4 mln. tonnasy kommertsııalyq resýrstarǵa tıesili»,- dedi E. Aman. «Korporatsııadaǵy astyqtyń jetkilikti kólemin eskere otyryp, bıýdjettik qarjy esebinen astyqtyń memlekettik turaqtandyrý resýrstaryn qalyptastyrýdyń qajettiligi joq»,-dep atap ótti Jaýapty hatshy. Onyń sózine qaraǵanda, qazirgi kezde bıylǵy astyqty qabyldaýǵa kásiporyndardyń daıyndyǵy 66 paıyzdy quraıdy.
E. Amannyń aıtýynsha, Úkimettiń sheshimine sáıkes Azyq-túlik korporatsııasy soltústik jáne shyǵys oblystardaǵy astyq qabyldaý kásiporyndaryndaǵy 400 myń tonnaǵa jýyq astyqty basqa óńirlerdiń elevatorlaryna tasymaldaý jumystaryna kiristi. Onyń ishinde 180 myń tonnaǵa jýyǵy Aqtóbe jáne Batys Qazaqstan oblystaryna kóshirilmek. «Bul sharalar óz kezeginde soltústik óńirde asyra tıelgen elevatorlardy bosatýǵa, sondaı-aq astyq jetispeýshiligine jol bermeý úshin jáne batys aımaǵyndaǵy nan baǵasynyń turaqtylyǵyna kepildik jasaýǵa múmkindik beredi», - dedi jaýapty hatshy
