Elimizdiń basym bóliginde qar jaýady - 1 aqpanǵa aýa raıy boljamy
ASTANA. QazAqparat - 1 aqpan kúni atmosferalyq fronttardyń ótýine baılanysty Qazaqstannyń basym bóliginde qar jaýady, dep habarlaıdy QazAqparat.
«Qazgıdromet» RMK-nyń aqparatyna sáıkes, respýblıkanyń shyǵysy men ońtústik-shyǵysynyń keı jerlerinde túnde qar molynan túsetini kútilýde. Tek ońtústik jáne batys óńirlerde kún jaýyn-shashynsyz ótedi. Soltústik aýdandarda Karsk teńizi aýmaǵynan sýyq aýa massalarynyń enýine baılanysty aýa temperatýrasynyń tómendeýi boljanady. Respýblıka boıynsha keı jerlerde tuman, kóktaıǵaq, burqasyn saqtalady, jel kúsheıedi.
Atap aıtqanda, Almaty oblysynyń jekelegen aýmaqtarynda tuman, kóktaıǵaq bolady. Túnde 15-20 m/s jyldamdyqta jel soǵady, Jalańashkól aýdanynda ekpini 20-25 m/s kúsheıedi.
Shyǵys Qazaqstan oblysynyń keı jerlerinde burqasyn, 15-20 m/s jel kútiledi, ekpini 23-28 m/s artady.
Qostanaı, Soltústik Qazaqstan oblystarynyń keı jerlerinde tuman, tańerteń jáne kúndiz burqasyn boljanady. Soltústik Qazaqstan oblysynyń keı jerlerinde jeldiń ekpini 15-20 m/s jetedi.
Pavlodar, Qaraǵandy oblystarynda túnde keı jerlerde burqasyn bolady. Jeldiń kúshi 15-20 m/s artady.
Mańǵystaý, Atyraý, Batys Qazaqstan, Túrkistan, Aqmola oblystarynyń keı jerlerinde tuman, kúndiz Aqmola oblysynda jaıaý burqasyn kútiledi. Túrkistan oblysynda kúndiz keı jerlerde jel 15-20 m/s kúsheıedi.
Jambyl oblysynda burqasyn, kóktaıǵaq, kúndiz 15-20 m/s ekpinde jel bolady.
Qyzylorda oblysynyń keı jerlerinde tuman, kóktaıǵaq kútiledi, jeldiń jyldamdyǵy 25 m/s kúsheıýi yqtımal.
