Elimizdiń basshylyǵy óner adamdaryn óte joǵary qadirleıdi - Z.Sháripova
ASTANA. 28 qańtar. QazAqparat - Búgin Prezıdenttik mádenıet ortalyǵynda Qazaqstan Respýblıkasy Mádenıet jáne aqparat mınıstrliginiń uıymdastyrýymen Qazaqstannyń halyq ártisi, «Otan», «Halyqtar dostyǵy», «Qurmet belgisi» ordenderiniń ıegeri Zámzágúl Sháripovanyń 80 jasqa tolýyna arnalǵan «Qazaq teatrynyń Qaragózi» atty shyǵarmashylyq kesh ótti.
Mádenı shara bastalar aldynda BAQ ókilderine shaǵyn suhbat bergen mereıtoı ıesi Z.Sháripova: «Men búgin mereıtoıymdy ótkizý úshin ózimizdiń sulý Astanamyzǵa kelip otyrmyn. Jaqsy qarsy alyp jatyr. Mynaý táýelsizdigimizdiń 20 jyldyǵyna meniń 80 jyldyq mereıtoıym týra kelip otyr. Qýanyshtan qýanyshqa bólenip jatyrmyn. Óner adamdaryn bizdiń basshylar óte joǵary qadirleıdi. Sondyqtan halyq aldynda esep bereıin dep keldim. Teatrda, kınoda, radıoda da, jalpy, ónerdiń qaı salasynda bolsyn 60 jyl qyzmet etip kelemin. Eńbegimdi sińirdim, halqyma rahmet. Jaqsy qarsy alyp, alǵysyn bildirip otyrady», - deıdi.
Aıta keteıik, Zámzágúl Núsipbaıqyzy Qazaqtyń M.Áýezov atyndaǵy memlekettik akademııalyq drama teatrynda jarty ǵasyrdan astam ýaqyt qyzmet etip, ulttyq dramatýrgııa men dúnıejúzilik klassıkadan san qyrly 100-den astam róldi somdady. Z.Sháripova jasaǵan san qıly sahnalyq beınelerdiń ishinde erekshe tulǵalanǵany - M.Áýezovtiń «Qaragóz» tragedııasyndaǵy Qaragóz beınesi. Bul beıne aktrısa shyǵarmashylyǵynyń eń jarqyn kezeńi boldy, onyń talantynyń lırıka-dramalyq qyryn meılinshe ashty. Tragedııalyq aktrısa retinde de múmkindigi mol ekenin tanytqan rólderiniń ishinde erekshesi S.Júnisovtiń «Ajar men ajalyndaǵy» Ajar boldy.
Ulttyq kıno salasynda da óz shyǵarmashylyq qoltańbasymen tanymal óner qaıratkeriniń fılmderde somdaǵan jáne dýblıajda sóıletken keıipkerleri, radıoqoıylymdarda oryndaǵan shyǵarmalary óner súıer qaýymnyń árdaıym esinde.
Keshte mereıtoı ıesi teatr sahnasynda somdaǵan keıipkerleriniń monologtary, súıikti aqyndarynyń óleńderi oryndalyp, kórermender nazaryna ol túsken kórkem fılmderden úzindi usynyldy.
Sonymen qatar mádenı sharaǵa arnaıy qatysqan Qazaqstan Respýblıkasynyń Mádenıet jáne aqparat mınıstri Darhan Myńbaı Elbasy N.Nazarbaevtyń mereıtoı ıesine arnalǵan quttyqtaýyn oqyp berip, ıyǵyna qamzol japty.
