Elimizdiń bas sanıtary qyzylshaǵa qarsy ekpe jasamaýdyń qaýpi týraly aıtty

ASTANA. QazAqparat - QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy - bas memlekettik sanıtar dáriger Jandarbek Bekshın qyzylshaǵa qarsy ekpe jasamaýdyń qaýpi týraly tarqatyp aıtyp berdi, dep habarlaıdy QazAqparat tilshisi.

«Mektepterde fıltr jasap, balalardy adamdar kóp jınalatyn jerge aparmaý kerek. Árıne, eń aldymen halyq arasynda aǵartý jumystaryn júrgizip jatyrmyz. Sebebi, áli de osy ekpeden bas tartyp jatqan azamattar bar. Turǵyndardyń keıbir bóligi qyzylshany aýrý dep sanamaıdy. Al aýrýǵa shaldyqqan balalardyń derti erteń asqynýy múmkin. Asqynǵan túri - pnevmonııa. Ekinshisi - entsıfalıt, bronhıt, al eń aýyry - panentsıfalıt. Bul aýrýdyń ereksheligi - ınfektsııa óz-ózinen basylmaıdy. Kúni erteń depressııa jaǵdaıynda aýrý shyǵyp ketedi», - deıdi ol OKQ-da ótken baspasóz máslıhatynda.

Jandarbek Bekshın óz sózinde atap ótkendeı, qyzylshanyń alǵashqy sııptomdary - álsizdik, tamaq pen bastyń aýrýy, murynnan sýdyń aǵyp, konıýktıvıttiń bilinýi. Odan keıin ǵana qyzylshanyń arnaıy óziniń sımptomy - bórtpe shyǵady. Sonymen birge, Jandarbek Bekshın vaktsınatsııadan bas tartatyn ata-analarmen qandaı jumys atqarylyp jatqany týraly suraqqa jaýap berdi.

«Bıyl qyzylshaǵa shaldyqqan naýqastardyń 76 paıyzy - vaktsınatsııadan ótpegender. Osy egilmegenderdiń arasynda taǵy bir sebep bar. 200-den astam bala ekpe jasatý jasyna áli kelmegen. Bizde ekpe bir jastan bastalady. Qazirgi tańda aýyryp jatqan 262 balanyń jasy - alty, jeti, segiz aılyq balalar. Osy sandardyń ishinde 45-i ekpeden bas tartqandardyń balalary. Sebebi, olardyń ata-analarynyń bilimi tómen bolýyna baılanysty balalar aýyryp jatyr. Sol sebepti, júkti áıelder keleshekte mindetti túrde vaktsına alýy kerek. Qorǵanys ımýnıteti balaǵa qanmen jáne sútpen beriledi», - deıdi ol.

Eske sala ketsek, Jandarbek Bekshın budan buryn turǵyndar mindetti túrde qyzylshaǵa qarsy ekpe jasatýy kerektigin habarlaǵan bolatyn.