Elimizdiń bas sanıtar-dárigeri alǵashqylardyń biri bolyp tumaýǵa qarsy ekpe aldy
ASTANA. QazAqparat - QR Ulttyq ekonomıka mınıstrligi Tutynýshylar quqyǵyn qorǵaý komıteti tóraǵasynyń orynbasary - elimizdiń bas sanıtarlyq dárigeri Jandarbek Bekshın búgin Astana qalasyndaǵy №5 emhanada ótken tumaý jáne JRVI aýrýlarynyń maýsymdyq beleń alýyna arnalǵan brıfıngte alǵashqylardyń biri bolyp tumaýǵa qarsy ekpe alyp, elge úlgi kórsetti.
Alymen ol terapevtke tekserilip alyp, sosyn egý kabınetine baryp vaktsına salǵyzdy.
«Óz densaýlyǵyńdy kútý kerek. Bul máselede eń bastysy - profılaktıka. Al tumaýdyń aldyn alýdyń eń tıimdi joly vaktsınatsııa bolyp qala bermek. Tumaýǵa beı-jaı qaraýǵa múlde bolmaıdy. Onyń qıynshylyqtary týraly aıtylyp ta, jazylyp ta júr. Sondyqtan barlyq Qazaqstan halqyna vaktsınatsııadan ótýge keńes beremin. Sonymen qatar S dárýmenine baı jemister men kókónisterdi kóbirek jeńizder. Eń durysy lımon, ıtmuryn, qaraqatty paıdalanyńyzdar, keshki asqa pııaz ben sarymsaqty kóbirek qoldanyńyzdar. Qol gıgıenasyn jaqsy saqtap, jyly kıinip, jabyq bólmelerde kóp otyrmaı, jıi jeldetip turyńyzdar. Antıvırýstyq jaqpamaılardy qoldanyńyzdar. Bul qarapaıym sharalar ımmýnıtetti kóterýge kómektesedi», - dedi J.Bekshın.
Onyń aıtýynsha, ózi jylda tumaýǵa qarsy ekpemen egilip, joǵaryda aıtqan sharalardyń barlyǵyn qatań saqtaıdy. Sonyń arqasynda ázirge densaýlyǵy syr bergen joq.
