Elimizdiń Bas prokýrorynyń tóraǵalyǵymen QR quqyq qorǵaý organdary Úılestirý keńesiniń kezekti májilisi ótti
ASTANA. Maýsymnyń 17-si. QazAqparat - Búgin QR Bas prokýrory Qaırat Mámıdiń tóraǵalyǵymen Qazaqstan Respýblıkasy quqyq qorǵaý organdarynyń Úılestirý keńesiniń kezekti májilisi ótip, onda sybaılas jemqorlyqpen kúres máseleleri, sondaı-aq BUU Komıtetiniń azaptaýǵa qarsy usynystaryn júzege asyrý barysy qaraldy.
Bul aqparatty atalǵan vedomstvonyń baspasóz qyzmeti taratyp otyr.
Sybaılas jemqorlyqpen kúrestiń tıimdiligin odan ári arttyrý, onyń ishinde memlekettik qurylymdardaǵy júıeli sybaılas jemqorlyqpen kúres quqyq qorǵaý organdary qyzmetiniń basym baǵyttarynyń biri bolyp tabylady. Osyǵan baılanysty quzyrly vedomstvolar sybaılas jemqorlyq kórinisterin joıý, olardy ýaqtyly anyqtap, jolyn kesý, sondaı-aq mundaı quqyq buzýshylyqtar úshin jazalanbaı qalmaıtyn qaǵıdatty júzege asyrýdy qamtamasyz etý boıynsha sharalar qoldanýda», delingen baspasóz aqparatynda.
Úılestirý keńesiniń músheleri tolyǵymen alǵanda quqyq qorǵaý organdarynyń atalǵan másele boıynsha ózara is -qımyl jónindegi jumystary men olardyń dárejesine oń baǵa berdi. Elimizdegi baǵa berýdiń kópshilik moıyndaǵan ólshemderi boıynsha anyqtalǵan sybaılas jemqorlyqqa kózqaras ındeksindegi oń ózgerister atap ótildi. Osy saladaǵy qazirgi qoldanystaǵy zańdardy jetildirý men zańdylyqty kóterý máseleleri de talqylandy. Sondaı-aq, Keńes BUU Komıtetiniń azaptaýǵa qarsy usynystaryn júzege asyrý jónindegi sharalardy qarady.
Vedomstvo aqparatyna sáıkes, májilis barysynda Bas prokýror sybaılas jemqorlyq kórinisterimen kúrestiń eń joǵary tıimdiligin qamtamasyz etýdiń mańyzdylyǵyn jáne bul baǵytta kúsh-jigerdi bosańsytýǵa bolmaıtynyn, sol sııaqty azamattardy azaptaý jáne olarǵa qatigezdikpen qaraýdyń basqa da derekteriniń jolyn kesýdiń qajettiligin atap ótken.
Talqylaý qorytyndysy boıynsha quqyq qorǵaý organdarynyń sybaılas jemqorlyqpen jáne azaptaýmen kúres jónindegi qyzmetterin odan ári kúsheıtýge baǵyttalǵan sheshim qabyldandy.
