Elimizdiń Bas prokýrory atyshýly M.Úsenovtiń fenomeni ne ekendigin aıtty

ASTANA. QazAqparat - Maqsat Úsenovtiń isinde eshqandaı da jemqorlyq jaıt oryn alǵan joq. Bul týraly búgin «Prokýratýraǵa úzdik kadrlar!» dep atalatyn dóńgelek ústel barysynda QR Bas prokýrory Jaqyp Asanov málim etti.

«Bilesizder me, Úsenovtiń teris jáne oń jaqtary da bar. Teris jaǵy onyń istegen isi. Sol ýaqytta biz, quqyq qorǵaý organdary halyqqa durys túsindire almadyq. Sondyqtan áleýmettik jelide adamdar talqylaı bastady. Qarapaıym túrde ǵana túsindirý kerek edi. Úsenov tórt túrli quqyq buzdy. Birinshisi qylmystyq, úsheýi ákimshilik. QR-nyń qoldanystaǵy qylmystyq kodeksine sáıkes, eger kináli jáne zardap shegýshi tarap tatýlassa, onda prokýror da, sotta, eshkimde ony joıa almaıtyndyǵyn aıtý qajet edi. Bul eki taraptyń buǵan deıingi quqyǵy edi.  Ony olar paıdalandy. Munda eshqandaı jemqorlyq áreket joq», dedi Bas prokýror.

Osy rette J.Asanov M.Úsenov qalǵan úsh ákimshilik quqyq buzýshylyq boıynsha barynsha eń joǵarǵy jazaǵa tartylǵandyǵyn basa atap ótti.

«Ekinshi jaıt, Úsenovtiń fenomeni nede? Úsenovten keıin barlyǵy, onyń ishinde Parlament te oılanyp Zań qabyldady. Eger qylmys jol kólik apaty barysyndaǵy ólim-jitimmen baılanysty bolsa, onda eshqandaı da tatýlasý bolmaıdy. Sol ýaqyttan beri mundaı qylmystyq quqyq  buzýshylyq, qylmysta tatýlasý qoldanylmaıdy», dedi ol.

Esterińizge sala keteıik, Almaty turǵyny Maqsat Úsenov 2013 jyly mas kúıinde kólik aıdap, 6 adamdy qaǵyp ketken bolatyn. Odan bir jigit qaza tapty. Ekinshi ret Maqsat Úsenov tizgindegen kólik Toıota kóligimen soqtyǵysyp, 38 jastaǵy kelinshektiń densaýlyǵyna zaqym keltirgen bolatyn. Eki jaǵdaıda da Úsenov taraptardyń keshirimin alyp, ákimshilik jazamen shekteldi.